- Publika iha: 07 Outubro 2011
Tuir Diretor Sentru Saude Formoza (CSF) Jaime dos Reis Belo katak ambiente ne’ebe fo’er bele fo impaktu ba komunidade sira nia saude tanba bele hada’et moras oi-oin.
Tuir nia, tipu moras ne’ebe bele hada’et liu husi foer mak hanesan ISPA (Infeksaun Sistema Respiratoriu), Diarea, Malaria no Denge.
”Atu antisipa moras ne’e atu labele da’et ba komunidade sira tenke soer foer iha nia fatin ne’ebe goernu prepara ona, hamoos uma laran, hamoos valeta kuak, fase liman molok atu han, fase hahan ho moos molok atu tein no hemu bee tasak,”hateten Belo semana kotuk (19/09) iha Formoza,Dili.
Tuir doutor ne’e katak moras ISPA dalabarak kona ba labarik ho idade 5 ba leten tanba halimar rai rahun barak,tahu no halimar foer sira seluk, enkuantu moras Malaria,diarea no dengue bele dae’t ba ema hotu.
Iha parte seluk tuir komunidade Domingos Soares, katak liu husi foer ne’ebe soe arbiru halo lalar mosu barak no liu husi lalar ne’e bele hada’et ba ema nia saude.
“Hau sente katak ezatamente soe foer arbiru liu husi lalar ruma ne’e bele afeta duni ita nia saúde liliu ba ita nia saúde fíziku tanba lalar ba hobur tiha foer ne’e depois mai belit fali iha hahan ne’ebe ita atu han,” nia katak.
Tanba ne’e husu ba komnidade hotu atu hatoman aan moris iha ambiente ne’ebe moos,hamoos uma ninin, uma laran.