- Publika iha: 30 Setembro 2011
Diretor Klinika Bairo-Pite doutor Daniel Murphy hateten moras Tuberkulose (TBC)sei domina iha klinika ne’e tanba iha pasiente 100 resin mak halo tratamentu iha klinik ane’e.
“Iha ne’e ami iha kama 50, e kama sira ne’e loron-loron nakonu hela deit e ohin pasiente ho moras TBC ida mak mate, pasiente balun diak ona e balun mate tanba pulmaun kanek todan ona,”hateten doutor Daniel Murphy semana kotuk (19/09) iha KBP Bairo-Pite, Dili.
Tuir dr.Dan, KBP mos iha programa ida hodi ajuda populasaun sira, liu-liu sira ne’ebe moras pulmaun hodi halo monitorizasaun ba sira iha suku to’o aldeia.
Tanba ne’e husu populasaun sira ne’ebe hetan moras TBC atu labele toba hamutuk ho sira ne’ebe la hetan moras ne’e nune’e labele da’et ba sira.
“labele toba ho labarik sira iha uma, diak liu mak toba mesak,se la’e bele da’et ba labarik sira liu husi anin e husu mos ba sira ne’ebe hetan moras ne’e atu lalais mai konsulta iha klinika sira nune’e bele hetan tratamentu e labele hein to’o pulmaun kanek hotu mak mai maibe lakonsege salva vida,”dr.Dan sujere.
Nia hatutan, moras TBC bele da’et ba sei deit, lahare ba idade e kada loron KBP transfere pasiente moras TBC ba Sentru Tibar hodi tratamentu diak liu tan iha ne’eba.
Entretantu tuir pasiente ne’ebe mai halo konsulta iha klinika ne’e, Maria Mendes katak moras TBC hanesan moras ne’ebe fasil atu da’et ba ema seluk.
“E pior liu mak hahan fo ba malu, hau rasik mear semana ida ona, e hau mai konsulta ona iha semana kotuk maibe seidauk simu aimoruk tanba seidauk hatene nia rezultadu koko mear ne’e,”nia dehan.