- Publika iha: 26 Setembro 2011
Xefe Sentru Saude Formoza (CSF), Jaime dos Reis hateten oras ne’e dadaun moras ISPA rejistu aas hamutuk 15.196 iha sentru ne’e tanba impaktu husi bailoro ne’ebe halo rai rahun suar maka’as.
“Agora dadaun ami rejistu pasiente hamutuk 15.196 mak hetan moras Ispa e pasiente hirak ne’e alende husi bairo formoza,mos husi Becora no Comoro, tanba rai rahun suar maka’as, kareta no motor nia suar mos bele afeita ba komunidade nia saude,” informa Xefe CSF aime dos Reis, semana kotuk (07/09) iha Bairo Formoza Dili.
Tuir nia, moras ispa alende kona labarik sira mos ba ferik no katuas sira, joven feto no mane, kona-ba labarik liu-liu labarik husi tinan 5 ba leten tanba halimar rai rahun entaun bele afeita ba sira nia saude.
Atu prevene moras ne’e tenke hamos ambiente inklui uma ninin sira, moris tuir saude publiku nian , hamos didiak uma ninin sira, para rai rahun labele suar maka’as .
Alende moras ispa, CSF mos rejistu moras sira seluk hanesan diarea, malaria, urinaria, no moras fenemoni e moras sira ne’e rejistu iha sentru ne’e.
Iha parte seluk Merry nudar pasiente ne’ebe la kohi fo sai nia identidade kompleto hateten agora tama bailoro entaun halo rai rahun suar maka’as no bele afeita ema nia saude.
“Tama iha ita nia inus kuak laran, ida ne’e bele afeta ba ita nia saude no halo ita moras ispa tanba tenke mai konsulta lalais iha fasilidade saude bainihra hetan moras,”nia dehan.
Dala ruma kalan toba mos la diak tamba mear hela deit no mos dada is ladiak hotu ida ne’e halo ita mos isin baruk hotu.