- Publika iha: 16 Setembro 2011
Komunidade sira iha capital Dili liu-liu komunidade Becora kontinua halerik ba bee moos maske kestaun ne’e membru Parlamentu sira hato’o ona ba iha Sekretariu Estadu Eletrisidade Agua e Urbanizasaun (SEAU) maibe laiha rezultadu.
“Problema bee moos iha Becora, hau foti bebeik ona iha ne’e no hato’o ona ba iha Sekretariu Estadu Agua nian atu dada bee moos ba komunidade sira maibe laiha rezultadu to’o agora e hau mak sai moe tiha deit,”preokupa Deputada Maria Rosa Camara, iha plenaria semana kotuk iha Parlamentu.
Tuir deputada ne’e, nia parte hasouru direitamente ho SE.Januariio Perreira no Ministru Pedro Lay, mas laiha resposta to’o agora.
“Sira dehan sim,sim mas ate agora bee la dada, lolos osan mak laiha ga oinsa,”nia preokupa.
Preokupasaun hanesan mai husi Deputadu Domingos Mesquita katak, problema bee moos sai preokupasaun boot ba ema hotu iha kapital Dili .
“Uluk hateten dehan tinan ida ne’e tinan infrastrutura maibe ate agora ita seidauk hare dezenvolvimentu diak iha setor ida ne’e,”Domingos kritika.
Tanba ne’e, nia espera katak governu liu husi SEAU bele resolve problema ne’e tanba bee importante ba ema nia moris lor-loron nian.
Tuir nia, komunidade kontinua menus bee moos tanba sistema fornesementu bee husi parte SAS mak ladiak. “maibe parte ida mos tanba ita nia populasaun balun seidauk iha komprensaun, balun estraga deit bee,balun sobu fali bee kanu hodi rega fali modo,”nia dehan.
“maibe importante mak petugas SAS sira tenke halo kontrola ba kanu sira ne’e nune’e bee labele estraga,”.