Quarta, Fevereiro 19, 2025

Postu Saúde Luca Postu Administrativu Viqueque Munisípiu Viqueque durante ne'e iha de’it pesoál saúde na’in-tolu (3), tanba ne'e atu amenta pesoál saúde iha fatin refere.

Postu Saúde Luca Postu Administrativu Viqueque Munisípiu Viqueque durante ne'e iha de’it pesoál saúde na’in-tolu (3), tanba ne'e atu amenta pesoál saúde iha fatin refere.

Iha parte seluk Koordenadór Postu Saúde Luca Lino Soares hateten, durante pesoál saúde na’in-tolu de’it mak halo atendimentu iha fatin refere.

"Ami-na'in tolu mak durante ne’e halo atendementu iha ne’e, mak hanesan enfermeiru ida no partera na’in-rua, ida-ne’e ha’u senti ladun di'ak. Tanba ne’e ami husu ba Diretór Servisu Saúde Munisípiu Viqueque nian atu bele koloka tan pesoál saúde balun mai iha ne’e," hatete Koordenadór postu saúde Luca, iha Nia knaar fatin, Luca.

Nia hatutan, tuir loloos pesoál saúde na'in haat (4) mak iha postu ne’e, maibé na’in-ida ba ajuda tiha iha postu saúde Wetali, entaun hela de’it sira na’in-tolu.

Nune’e komunidade Suku Luca, João da Silva hateten, postu saúde ne’e ema ba simu ai-moruk ruma tenke hein enfermeiru sira, tanba enfermeiru na’in-ida de'it.

"Ami moras mai atu simu ai-moruk tenke hein lai, tanba enfermeiru dala ruma sei iha uma, dala ruma sei ba atende ema iha ema nia uma, entaun ami tenke hein," nia dehan.

Diretór Servisu Saúde Munisípiu Viqueque (SSMV) Dr. Aljaksono Soares Maia hateten, loos duni katak iha postu saúde barak mak menus pesoál saúde.

"Loos duni ami iha ne’e iha postu saúde balun menus duni pesoál saúde," nia dehan.

Nia hatutan, pesoál saúde sira postu sira ne’e tuir loos tenke ema na’in-neen, maibé tanba pesoál saúde la to'o, entaun postu saúde sira balun ema rua ou tolu de’it.

Nia salienta, parte SSM Viqueque nian halo ona mapamentu ida ba iha Ministériu Saúde atu oinsá bele amenta pesoál saúde sira-ne’e.

"Ami prepara ona mapamentu ba Ministériu Saúde atu nune’e bele amenta tan pesoal saúde iha postu sira ne’e, tanba ne'e ita hein deit resposta husi Ministériu Saúde," nia afirma.