- Publika iha: 20 Janeiro 2025
Hahú husi fulan Janeiru to'o Dezembru 2024 Servisu Saúde Munisípiu Viqueque (SMV) rejistu kazu moras Infeksaun Respiratóriu Alta (ISPA) hamutuk rihun-haatnulu-resin-neen-atus-lima-haat-nulu-resin-haat (46544).

Diretór Servisu Saúde Munisípiu Viqueque (SSMV) Dr. Aljaksono Soares Maia hateten, durante tinan ida nia laran SSM-Viqueque rejistu kazu moras ISPA mak sa’e makas, pasiente balun ne’ebé grave, pesoál saúde sira iha postu saúde kontatu ambulánsia ba tula hodi ba liu halo tratamentu iha ospitál referal.
"Pasiente sira ne’ebé moras grave ne’e, ita-nia pesoál saúde sira iha postu kontatu ambulánsia tula ba halo tratamentu iha ospital referál, tanba ita hatene katak iha postu saúde sira-ne’e haree de’it ba moras sira ne’ebé babain, bainhira rejista moras todan sira tenke halo transferénsia lalais ba Hospital Referensia," nia esplika.
Nia salienta, durante ne’e buat hotu la'o di'ak la iha problema ruma mak akontese iha área Servisu Saúde Munisípiu Viqueque.
"Ita durante ne'e la iha problema kona-ba ai-moruk, tanba ne’e prosesu halo atendimentu ba pasiente sira la’o hanesan babain," nia klarifika.
Nia informa, dadus ne’ebé mensiona tinan kotuk nian, maibé kona-ba dadus tinan ida-ne’e seidauk iha.
Iha parte seluk Koordenadór Postu Saúde Luca Lino Soares hateten, moras ne’ebé agora aas mak ISPA.
"Agora ne’e moras ISPA mak barak liu iha suku ida-ne’e, moras ida sa’e makaas ne’e, tanba mai husi fatór oioin, hanesan fatór ambiental, estilu de vida komunidade nian, hanesan fuma no rai rahun makaas," nia dehan.
Nia hatutan, moras sira ne’e halo tratamentu no simu ai-moruk fila ba uma, moras seluk balun ne’ebé grave entaun pesoál saúde sira kontaktu ambulansia tula ba ospitál referál.