- Publika iha: 20 Janeiro 2025
Hospital Nacional Guido Valadares (HNGV) halo transferénsia pasiente na'in-sanulu-resin-tolu (13) ba iha Hospitál António Carvalho Lahane, tanba fatin iha hospitál Nasionál la sufisiente.

Diretór Servisu Apoiu Diagnóstiku no Terpeutika iha HNGV Vidal de Jesus Lopes hateten, loos duni katak HNGV komesa halo transferénsia pasiente balun ba ona iha Lahane, tanba númeru pasiente iha HNGV ne’e sae makas.
"Ita halo ona transferénsia pasiente na’in-13 ba ona iha Lahane, tanba fatin iha HNGV la sufisiente,nune’e mós tanba númeru pasiente barak liu, ita hahú halo transferénsia ba iha Lahane," nia dehan iha nia servisu fatin HNGV, Díli.
Nia hatutan, iha semana ida ikus ne’e HNGV enfrenta ba problema pasiente barak liu, tanba difikulta pasiente balun tenke halo transferénsia ba Lahane hodi halo tratamentu no HNGV mós sei halo koordenasaun ho Sentru Saúde Formoza no Vera Cruz atu nune’e fatin la to’o nafatin bele transferénsia balun ba iha ne'eba.
"Semana ida ikus ne’e HNGV enfrenta problema tanba pasiente sira barak liu, tanba ne’e ita sei halo koordenasaun ida ho Sentru Saude Munisípiu Dili atu nune’e bainhira pasiente sira balun ita bele haruka ba iha Sentru Saude Formoza no Vera Kruz hodi halo tratamentu," nia deklara.
Nia salienta, kama iha HNGV ne’e 400, maibé uza hotu ona, tanba ne'e HNGV buka alternativu seluk hodi haruka pasiente balun ba iha Lahane.
"Iha HNGV kama 400 ne’e ita uza hotu ona, entaun ita tenke buka alternativu seluk hodi halo fali transferénsia pasiente sira ba iha Lahane," nia esplika.
Nia salienta tan katak pasiente sira nain 13 ne'ebé ba halo tratamentu iha hospital António Carvalho ne’e hanesan babain, tanba pesoal saúde sira iha HNGV mak ba fó tratamentu ba sira.
Iha fatin ketak, Familia Pasiente Afonso Martins hateten, agora dadaun ema moras aumenta nafatin, fatin iha ne’e mós la to’o.
"Ha’u lori ha’u-nia mãe mai halo tratamentu iha ne’e besik semana ida ona, ita haree kada loron ne’e ema sementa ba bebeik, karik semana ida tan ita atu la’o mós la diak ona karik, tanba ema moras barak liu," nia dehan.
Nune’e mós Diretór Ezekutivu FONGTIL Valentim da Costa Pinto hateten, Governu tenke tau duni atesaun másimu ba problema sira hanesan ne'e, tanba ne’e problema sériu.
"Ita nafatin husu ba Governu liuliu ba Ministériu Saúde atu haree didiak problema sira hodi rezolve labele haree problema sira-ne'e hanesan la vale, se ita la rezolve ho sériu mak ita-nia povu sira sei mate hotu de’it, tanba ita la tau atensaun ba problema sira hanesan ne'e.