Quarta, Fevereiro 19, 2025

Diretór Ezekutivu Ospitál Referál Oe-cusse Manuel Magno dehan, komunidade iha Rejiaun Administrativa Espesiál Oé-Cusse Ambeno (RAEOA) durante ne'e sempre asesu ba tratamentu iha fasilidade saúde ho kondisaun ne’ebé grave ona, tanba bainhira foin moras ne'e sira ba halo uluk kurativu ho aimoruk tradisional.

Diretór Ezekutivu Ospitál Referál Oe-cusse Manuel Magno dehan, komunidade iha Rejiaun Administrativa Espesiál Oé-Cusse Ambeno (RAEOA) durante ne'e sempre asesu ba tratamentu iha fasilidade saúde ho kondisaun ne’ebé grave ona.

Nia dehan, baibain família lori moras ba ospitál la'ós moras ne'ebé sei kman ne'e, maibé grave ona mak foin lori ba fasilidade, tanba sira prefere liu halo tratamentu tradisional.

"Ita iha ospitál referál Oe-cusse ita hasoru problema mak atendimentu ba komunidade sira, tanba komunidade sira senti kondisaun grave tiha maka halo tratamentu iha fasilidade saúde," nia hatete.

Nia dehan, komunidade sira dala ruma hetan moras natoon mak nia foin mai halo konsulta, ami bele fó atendimentu dala ruma bele salva sira-nia vida,maibé kuando mai ho grave ona iha ospitál la bele halo buat ida, entaun pasiénsia tenke hakotu nia vida iha ospitál.

"Ami nafatin koordena ho Servisu rejionál sira mak toma konta ba servisu saúde primaria oinsá atu bele eleva no hasa'e kapasitasaun ba iha promosaun sira ba iha komunidade hodi bele asesu ba fasilidade saúde hodi halo tratamentu la'ós lori fali ba halo tratamentu tradisional," nia hatete.

Nia dehan, Timor hanoin hanesan de'it husi rai ulun to'o rai ikun, liu-liu sira ida parte foho, kaundu moras ne'e sira la mai lalais fasilidade saúde, maibé sira tenke ba buka matan dook, sei hein lai sei buka ida ne'e no ida ne'ebá.

Nia hatete, entaun grave ona mak foin lalais mai iha ospitál ka bolu ona ambulánsia, bele refere mai.

Entretantu komunidade Angela Colo dehan, rekoñese katak kuandu moras sira tenke ba uluk halo tuir kultura nian ka buka matan dook lai depois mak foin lori ba sentru saúde sira.

"Ami fiar tratamentu kultural ou ba matan dook, tanba ami mós sempre halo kurativu no balun konsege di'ak, ladi'ak mak sira lori fali ba ospitál," nia dehan.

Nia dehan, bainhira lori ba ospitál dalaruma bele salva no dalaruma mós la salva, ida ne'e mós tanba planu Maromak nian.