- Publika iha: 20 Dezembro 2024
Vise-Primeiru-Ministru no Ministru Koordenadór ba Asuntu Sosiál no Ministru Dezenvolvimentu Rurál no Abitasaun Komunitária Mariano Assanami Sabino husu ba Profesional Saúde sira atu sai hanesan salvadór ba pasiente sira hotu.

Nia dehan, Pesoal Saúde sira-nia servisu mak oinsá atu sai Salvador ba pasiente, laiha kor partidu no laiha polítika, tanba médiku nia servisu atu fó atendimentu ba pasiente.
"Médiku hotu-hotu nia funsaun prinsipál maka nu’udar salvadór atu salva pasiente, tanba imi jura katak imi sai salvadór ba pasiente sira, ho didikasaun, servisu la’ós ho matenek, maibé ho kurasaun ka domin," hatene Visi-Primeiru Ministru no Ministru Koordenador ba Asuntu Sosiál, Assanami liuhusi nia diskursu iha salaun Palácio da Sinzas, Caicoli, Díli.
Nia tenik, saúde sai pilar importante ba estadu no ba nasaun, tanba ne'e tenke tau ona iha Planu Estratéjiku Dezenvolvimentu Nasional (PEDN).
"Ita hatene katak, se de’it maka servisu iha saúde ne’e la’ós servisu de’it, maibé ne’e hanesan misaun ida ne’ebé importante tebes ba ita-nia rai, tanba úniku saúde maka bele fó salvasaun ba ita-nia povu no kuidadu ba ita-nia povu, povu ne’ebé saudável no hamosu hanoin ne’ebé saudável no nasaun bele saudável, tanba ne’e saúde imporante ba ita-nia povu no ita-nia nasaun,"nia esplika.
Nia informa, Profesional Saúde sira-nia servisu importante tebes, maske fasilidade seidauk to’o, maibé mantein ho juramentu.
"Husi mantein nafatin imi-nia juramentu, mantein ho imi-nia funsaun ne’ebé importante tebes, tanba ne’e pilar rua ne’ebé maka ita labele politiza, ida maka saúde, ita tenke dedika ba estadu, tanba pilar ida ne’e, pilar ida fundamentu tebes ba ita-nia nasaun," nia deklara.
Xefe Departamentu Emerjénsia Hospital Nasional Guido Valadares (HNGV), Julia Rodriques Quintão esplika, kona-ba atendimentu saúde ba pasiente sira iha sala HNGV la’o normal hanesan baibain.
“Ita-nia médiku sira iha Sala-Emerjensia fó atendimentu saúde ba ita-nia pasiente sira iha 24 oras nia laran, ita haree la’o normal hanesan baibain,” nia Informa.
Nia hatutan, sira sempre fó atendimentu ne’ebé di’ak ba pasiente sira, tanba sira moras mak ba halo tratamentu, tanba ne’e sempre fó atendimentu ne’ebé dignu ba sira.