- Publika iha: 20 Dezembro 2024
Vise-Ministru ba Fortalesimentu Instituisional Saúde (VMFIS) José dos Reis Magno hateten, Timor-Leste hetan fundu husi Fundu Global ba dala uluk ninian ho valor USD 2,876,903 (dois milloens, oitusentus e setenta e seis mil, novisentus e três dolares Amerikanu) ba kontrolu moras oin tolu hanesan Moras HIV-SIDA, Tuberkulozia no moras Malaria durante tinan tolu.

"Timor-Leste durante ne'e hetan apoiu makaas husi Fundu Global ho orsamentu ne’ebé mak boot, atu oinsá bele hodi halo kontrolu ba moras oin tolu mak hanesan HIV, TB no Malaria, maske nune'e mós ita nafatin halo avaliasaun ba progresu no dezefiu ba implementasaun ba programa sira.
Deskuti mós kona-ba estratéjia neʼebé viável-em espesial halo atualizasaun ba planu estratéjiku nasional hodi hakotu moras TB, HIV Malaria iha Timor-Leste," dehan Vise-Ministru Saúde Fortalesimentu Instituisionál Saúde iha aniversáriu Globál Fund ba dala 20 iha Palasiu Presidente Aitarak-Laran, Díli.
Nia hatutan, iha tinan 2020 to'o 2021 Timor-Leste afeita hela ba Covid-19, ikus atendementu ba moras TB barak paradu la ba halo tratamentu, tanba ne'e governu Timor-Leste sei servisu makaas hosi kombate moras sira-ne’e iha komunidade nia leet.
Iha fatin hanesan, Prezidenti Global Fund, Felipe da Costa hateten, Global Fund iha Timor-Leste kuaze tinan 22 nia laran hamutuk ho governu implementa ona programa hodi kombate moras tolu iha Timor-Leste.
"Durante tinan 22 nia laran ita servisu hamutuk ho governu Timor-Leste hodi apoiu orsamentu lubuk ida hodi konsege rezolve ona moras tolu hanesan HIV-SIDA, Tuberkulozia no moras Malaria iha Timor-Leste," dehan Prezidente Global Fund.
Nia hatutan, Timor-Leste sei nafatin halo esforsu oinsá atu bele kompate moras oin tolu ne’e hodi nune'e bele hetan sertifikasaun.