Postu Saúde Buicarin Kontinua Halerik Tanba La Iha Médiku Espesialista Ai-Moruk

Postu Saúde Buicairin Suku Bahalarawain, Postu Administrativu Viqueque, Munisipiu Viqueque to’o agora sei kontinua halerik, tanba la iha médiku espesialista ai-moruk nian.

Koordenadór Postu Saúde Buicarin, Abilio Gomes hateten, durante ne’e sira la iha médiku espesialista ba ai-moruk, tanba ne’e servisu hotu sira mak halo.

“Ami durante ne’e iha postu saúde Buicarin la iha médiku espesialista, tanba ne’e servisu hotu-hotu ami mak halo hotu,” dehan Koordenadór Postu Saúde Buicarin, iha nia servisu fatin, Buicarin, Viqueque.

Nia hatutan, sira haruka duni enfermajen ida mak ba iha postu saúde refere, maibé la to’o fulan fila fali de'it.

“Ami husu duni dotór ida no enfermajen ida, atu mai halo servisu iha ne’e, tanba sira mak komprende di'ak liu kona-ba ai-moruk sira-ne’e, sira haruka duni enfermajen ida mai iha ne’e maibé mai la to’o fulan ida fila fali de'it,” nia deklara.

Nia hatutan, Postu Saúde Buicarin uluk iha voluntáriu sira mós iha, maibé agora la iha ona, tanba Ministériu Saúde (MS) hapara hotu tiha, tanba ne’e sira-na'in tolu mesak mak halo servisu.

“Uluk Postu Saúde Buicarin ne’e iha mós voluntáriu lubuk ida, maibé agora sai hotu ona tanba Ministériu saúde hapara hotu, agora hela ami-na'in tolu mak halo servisu iha ne’e, ami-na'in tolu ne’e mak hanesan enfermeiru ida, parteira ida no asisten ida, ami-na'in tolu ne’e halo hotu servisu sira-ne’e,” nia esplika.

Iha fatin ketak Xefe Suku Bahalarawain Angelo Pinto hateten, durante ne’e postu saúde Buicarin ne’e halo servisu tuir de'it programa husi Sentru Saúde Munisípiu Viqueque, maibé Postu Saúde ne’e dotór la iha.

“Loos duni katak postu saúde Buicarin ne’e to’o agora dotór la iha, tanba ne’e enfermeiru no parteira sira iha ne’e mak halo hotu servisu sira-ne’e,” dehan Xefe Suku Bahalarawain.

Nia hatutan, nu’udar autoridade lokál nia rasik ona karta ida ba iha munisípiu atu haruka dotór ida ba iha postu saúde refere, maibé to’o agora sira iha munisipiu seidauk hatán ba karta ne’e.

“Ha’u halo ona karta ida ba iha munisípiu atu haruka dotór ida mai halo servisu iha ne’e, maibé to’o agora la mai,” nia deklara.

Tanba ne’e nia husu ba iha munisípiu atu haruka netik dotór ida ba servisu permanente iha postu saúde Buicarin atu nune’e bele tau matan ba komunidade ho di'ak.

Nune’e mós membru Komisaun F iha Parlamentu Nasionál ne’ebé trata Asuntu Saúde, Seguransa Sosiál no Igualdade Jéneru Deputadu Nurima Ribeiro Alkatiri dehan, problema sentru saúde la iha médiku espesialista, tanba iha tinan kotuk Ministériu Saúde hapara kontratu Profesional Saúde rihun 2 resin.

"Iha Sentru saúde to’o nasional menus profesional Saúde ne'e, tanba desizaun Ministériu Saúde nian hodi hapara hotu tiha pesoal saúde sira ikus tenke simu konsekuénsia, maibé ita hein tinan 2025 problema sira hanesan ne'e governu bele rezolve, atu povu labele enfrenta tan problema sira hanesan ne'e," nia dehan.

Nia hatutan, governu liuliu MS iha kompeténsia hodi rezolve problema sira-ne'e, tanba sistema saúde ne’e importante ba ema hotu.