HOREX Baucau Rejista Bebé Na’in 42 Mate Iha Kabun Laran

Ospital Rezional Eduardo Ximenes (HOREX) Baucau rejista kazu oan mate iha kabun laran hamutuk haat-nolu-resin-rua (42), dadus ne’e rejista hahú husi fulan Janeiru to'o Outubru 2024 ne’e.

Xefe Departamentu Sala Maternidade iha HOREX Baucau, Bernardina Freitas Marcal hateten, durante ne’e HOREX Baucau halo atendimentu ba inan partus sira no bebé na'in 42 mak mate.

"Durante fulan 10 (Janeiru-Outobru) nia laran HOREX Baucau rejista kazu bebé mate iha inan nia kabun laran hamutuk 42," dehan Xefe Departamentu Maternidade HOREX Baucau iha nia servisu fatin, Baucau.

Nia esplika, bebé na’in 42 ne'ebé mate iha inan nia kabun laran ne’e, tanba to’o iha ospital ho kondisaun grave liu ona.

"Bebé nain 42 ne'ebé mate iha inan nia kabun laran ne’e, tanba mai ospitál tarde ona, entaun bebé nia kondisaun grave liu, ikus dotor sira iha ne’e labele salva bebé nia vida," nia akresenta.

Nia salienta, inan balun mai bebé mate kedas ona iha sira-nia kabun laran antes to’o iha ospitál, la’ós mate iha ospitál.

Iha fatin hanesan, Diretór Ezekutivu Ospital HOREX Baucau, Claudino Ximenes deklara, hospital rezional Eduardo Ximenes Baucau ne'e sentru ba Munisípiu tolu, tanba ne'e pasiente sira ne’ebé mai ho distánsia dook entaun to'o iha ne’e grave tiha ona.

"Hospital Rezional Eduardo Ximenes Baucau ne'e sentru ba munisípiu tolu, hanesan Baucau, Lospalos no Viqueque, tanba bainhira pasiente sira iha Lospalos ka Viqueque mak halo transferénsia mai ne'e susar, liuliu inan isin-rua sira, dala ruma ita labele salva inan ho oan dala ida, tanba sira mai ho kondisaun ida ne'ebé mak ita bele dehan grave tiha ona, depois lao do'ok, entaun to'o mai iha ne’e ita labele salva oan ou inan," dehan Diretór Ezekutivu.

Nune’e mós akademista husu Universidade Oriental Timor Lorosa'e (UNITAL) nia Klase Paralelu Baucau Beatris Mendonça Cabral hateten, HOREX Baucau ne'e sentru ba munisípiu tolu, tanba ne'e bainhira pasiente ida moras mak labele halo tratamentu iha munisípiu tenke haruka mai iha ne’e, liuliu inan isin-rua sira ne'ebé atu partu ne'e.

"HOREX Baucau ne'e sentru ba Munisípiu tolu hanesan Baucau, Lospalos no Viqueque, tanba ne'e bain hira pasiente ida moras mak labele ona atu halo tratamentu iha munisípiu tenke haruka mai Hospitál Regionál, liu inan isin rua sira ne'ebé mak atu partus," dehan Akademista.

Nia hatutan, distánsia fatin do'ok pasiente nia kondisaun mós grave loos ona, hanesan inan sira ne’ebé atu partus ne'e, dala ruma to'o iha ospitál dotor sira labele salva inan ho oan, tanba fatin do'ok depois pasiente ne'e mós grave liu ona.