Durante 24 Horas HOREX Baucau Fó Partus Inan Isin-Rua 5 To’o 6

Durante loron ida (24 horas) sala Maternidade iha Hospital Rezional Eduardo Ximenes (HOREX) Baucau, halo atendimentu partus ba inan isin-rua sira na’in-lima (5) to'o na'in-neen (6).

Xefe Sala Maternidade HOREX Baucau Bernardina Freitas Marçal hateten, pesoál saúde sira halo atendimentu ba inan isin-rua sira ne'ebé atu partus iha ne’e 24 husi na’in-lima (5) to'o na'in-neen (6).

"Inan isin-rua sira ne'ebé mai partu iha ami prontu atende 24 horas, iha 24 horas nia laran ne’e, ami fó partus ba inan sira maizumenus na’in lima ou na’in neen hanesan ne'e," dehan Xefe Departamentu Maternidade iha HOREX Baucau.

Nia hatutan, loron ida pesoal saúde sira fó partus ba inan isin-rua sira-ne'e iha na’in-lima to'o na’in-neen, aleinde ne’e iha inan balun partu la normal, tanba ho komplikasaun seluk.

"Iha loron ida partus na’in-lima to'o na’in-neen, maibé iha inan balun ne'ebé mai partu ho kondisaun la normal, tanba ho komplikasaun seluk hanesan raan fakar makaas no balun bebé toba sala, entaun dotor sira deside, halo sejariana ba inan sira-ne’e," nia salienta.

Iha fatin hanesan, pasiente Teresa António Marcal hatete, partus iha HOREX Baucau di’ak, tanba atendementu husi partera sira di’ak, maské ema barak, kada loron ne’e ema nain 5 ou 6 mak partu iha fatin ne’e.

"Ha’u mai partus iha ne’e di'ak, tanba atendementu husi parteira sira mós di'ak, maské loron ida ema na’in 5 ou 6 hanesan ne’e mak partu dala ida mós ita senti di’ak hela, tanba parteira sira iha ne’e atende di’ak," nia dehan.