- Publika iha: 03 Dezembro 2024
Família Pasiente Luis do Carmo husi Munisípiu Lautem ne’ebé halo tratamentu iha Ospitál Rejionál Eduardo Ximenes (HOREX) Baucau informa, Ospital HOREX Baucau nia atendementu di’ak, maibé raan atu fó ba pasiente maka susar tebes, tanba fatin Banco de Sange laiha.
"Ha’u horseik ferik oan partu, maibé raan laiha, tanba fatin Banco de Sange laiha, entaun stok raan laiha, tanba uma ne’ebé sufisente atu rai raan laiha, tanba ne’e ami família mak buka rasik hodi hasai raan depois tau kedas ba ferikoan, ita atu rai ba loron aban labele," nia Informa.
Nia husu ba Governu liuhusi Ministériu Saúde tenke harii uma ba Banco de Sange, atu nune’e pasiente ne’ebé persiza raan, hein foti hodi uza ba pasiente ne’ebé presiza.
Nune’e mós Pasiente Teresa António Marçal dehan atendementu iha Ospital HOREX la’o di’ak tebes, maibé Ministériu Saúde tenke harii banco de sange para hodi rai raan sira ne’ebé família pasiente hasai no doador raan sira hasai hodi tulun pasiente liu-liu inan isin-rua sira.
"Fatin Banco de Sange laiha fó impaktu tebes ba ami inan isin-rua sira, tanba banhira ami partus maka raan ne’e fakar barak tenke fó lalais raan, ou balun mai bebé mate iha kabun laran, raan fakar barak ona, depois raan laiha ne’e bele lakon vida, tanba raan prepara antes ne’e laiha," nia afirma .
Ospitál Rejionál Eduardo Ximenes (HOREX) Baucau durante ne’e laiha Banco de Sange hodi rai raan, tanba ne’e Governu liuhusi governu Ministériu Saúde (MS) atu harii fatin ba Banco de Sange hodi família pasiente no ema halo doasaun raan, bele rai iha fatin refere hodi atendementu ba pasiente sira.
Relasiona ho asuntu ne’e, Diretór Ezekutivu Ospital HOREX Baucau, Claudino Ximenes hatete, agora dadaun ospital HOREX iha ona planu halo ona dezeinu hodi aprezenta ona ba Ministériu Saúde (MS) hodi koloka orsamentu para harii fatin Banco de Sange ida iha Baucau.
"Ita-nia Ministériu Saúde hodi apoiu halo ona dezeñu, ita hatama ona ninia bioqi ho orsamentu, ita hein ninia aprovasuan depois Ita implementa, sei ita-nia governu tau Osan ona tinan 2025 ita bele implementa ona," nia koalia ba jornalista sira iha Ospital HoREX Baucau.
Nia dehan, iha tékniku sira iha Ospital HOREX Baucau sufisente hodi hasai raan, maibé fatin banco de sange mak laiha atu rai raan.
"Ami iha tékniku hodi hasai raan, maibé laiha fatin atu asegura raan, nune’e stok nee iha hela de’it hodi uza ba semana no to’o fulan nee laiha, tanba ami iha ne’e depende de’it ba família pasiente, laiha doasaun raan ne’ebé rutina para fó ba ospital," nia esplika.
Nia deklara, bainhira pasiente prezisa raan, depois ospital ho família pasiente esforsu hodi buka raan, atu nune’e fó pasiente hodi salva lalais ema nian vida.
"Banhira família pasiente presiza raan, mai informa ami esforsu hodi buka raan, sei família pasiente hetan ona, entaun sira lori mai hasai raan, maibé sira laheten entaun mai ami hamutuk ho Diresaun ospital nia hodi buka fali raan liuhusi ministériu relevante sira hanesan, eskola sira, relizaun, PNTL no F-FDTL sira hodi oferese sira-nia raan turuk ida hodi salva pasiente nian vida.
Ami iha ne’e dala barak kazu sira hanesan ita-nia inan isin rua sira partus mai raan fakar barak, depois ita labele salva nia vida, maibe ami esforsu nafatin buka, maibe lahetan, ne’e ami transfer lalais ba HNGV para hetan atendementu lalais," nia tenik.