Nasaun 9 Halo Avaliasaun Ba Sistema Saúde Iha Timor-Leste

Péritu Internasionál ruanulu resin tolu (23) husi nasaun sia (9) hanesan Estadus Unidus, Índia, Suisa, Austrália, Tailándia, Butan, Nepal, Myanmar no Mongólia halo avaliasaun ba sistema saúde iha Timor-Leste.

Vise-Ministru Fortalesimentu Institusionál Ministériu Saúde nian José dos Reis Magno hateten, sorumutuk ida importante tebes hodi avalia Timor-Leste nia kapasidade atu prevene, deteta, no responde ba ameasa saúde públika tuir Regulamentu Saúde nian.

“Péritu Internasionál ruanulu resin tolu (23) husi nasaun sia (9) mai halo avaliasaun ba sistema saúde iha Timor-Leste, tanba ne'e mai ita uza oportunidade ida-ne’e hodi rona no aprende husi péritu sira iha nasaun seluk,” dehan Vise-Ministru Saúde Fortalesimentu Instituisionál Saúde iha Hotel JL-World Kristu Rei, Díli.

Nia hatutan, espesialista globál na'in 23 husi Estadus Unidus, Índia, Suisa, Austrália, Tailándia, Butan, Nepal, Myanmar no Mongólia. Iha semana ida nia laran, sira sei avalia área téknika 19 no indikadór 56, hodi aprofunda aspetu xave sira hanesan vijilánsia moras, sistema laboratóriu, resposta emerjénsia, no rezisténsia antimikrobiál.

Nia husu ba pesoál sira husi departamentu sira hanesan Laboratóriu Nasionál Saúde, INSP-TL, Vijilánsia, Imunizasaun, SNAEM/HEOC, Servisu Veterinaria , no ajensia seguransa sira ne’ebé marka prezensa iha eventu refere hodi rona no aprende buat foun ruma husi ema sira-ne’e.

Iha fatin hanesan Dr Arvind Mathur, Reprezentante OMS nian ba Timor-Leste, bolu ho naran JEE hanesan pasu krítiku ida atu asegura Timor-Leste ida ne’ebé seguru no saudavel liu enkuantu kontribui ba paizajen saúde globál ida ne’ebé forte liu.

"Ida-ne'e reflete aprosimasaun ida ne'ebé transparente no proativu hodi rezolve dezafiu atuál sira no identifika oportunidade sira ba hadi'a.

Krize globál sira foin lalais ne'e hanesan COVID-19 no Mpox, nomós dezafiu lokál sira hanesan raiva, dengue, no chikungunya, hanesan lembransa urjente sira kona-ba importánsia prevensaun nian, preparasaun no reziliénsia,” dehan Dr. Mathur.

Nia mós agradese ba doadór no parseiru sira, liliu ba DFAT, KOICA, Indonesia no Thailandia ba sira-nia tulun.