Hahú Fulan Janeiru-Outubru 2024 Postu Saúde Buicarin Rejistu Kazu Moras Ispa 5692

Postu Saúde Buicairin Suku Bahalarawain, Postu Administrativu Viqueque, Munisipiu Viqueque rejistu kazu moras Infesaun respiratóriu (ISPA) durante fulan sanulu hahú husi Janeiru to’o Outobru hamutuk rihun-lima-atus-neen-sia-nulu-resin-rua (5692).

Koordenadór Postu Saúde Buicarin, Abilio Gomes hateten, durante ne’e postu saúde Buicarin rejistu kazu moras ISPA mak sa’e makas liu.

"Moras ISPA ne’e moras ida ne’ebé baibain tiha ona, tanba tinan-tinan moras ne’e kontinua iha, moras ne'e kona ita, tanba haree ba ita-nia kondisaun ambiente, tempu bai-loron rai rahun mak fó impaktu mai ita, tanba ne’e postu saúde Buicarin Rejistu kazu moras ISPA sa’e makas to’o 5692," hatete Koordenadór Postu Saúde Buicarin Gomes.

Nia hatutan, moras ida-ne'e fasil atu kona ema, liuliu labarik ki'ik sira, tanba sira ba halimar rai-rahun, han la kuidadu aan, entaun moras ne’e fasil atu kona.

"Moras ne'e fasil atu kona ita ema liu-liu labarik ki'ik sira, tanba dala ruma sira ba halimar sira la kuidadu aan naran han, naran hemu de’it entaun moras ne’e fasil atu kona sira," nia esplika.

Nia salienta, ligadu ba ai-moruk ida-ne'e sufisiente hela tuir kondisaun iha área rurais nian, iha fulan kotuk mak ai-moruk esensial sira-ne'e la iha, maibé liu de’it semana ida ai-moruk iha fali ona, tanba ne’e ai-moruk iha.

"Ai-moruk hodi halo tratamentu ba pasiente sira-ne’e sufisiente hela tuir kondisaun área rurais nian, ami sempre uza maneira oioin atu ai-moruk ne'e bele to'o fulan ida," dehan Koordenadór Postu Saúde Buicarin.

Iha fatin hanesan pasiente Agustina de Jesus hateten, durante ne’e sira moras hanesan mear, isin manas, ulun moras sira ba halo de’it taratmentu iha postu-saúde hanesan babain.

"Ami durante ne'e moras ona mai deit halo tratamentu iha ne'e, tanba ne'e agradese tebes ba ami-nia enfermeiru no partera sira ne'ebé servisu iha ne’e hodi haree ba ami-nia moras," nia dehan.

Nia hatutan, dala ruma mai konsulta ai-moruk la iha, maibé enfermeiru sira buka meiu oinsa para ema sira ne'e tenke hetan netik ai-moruk musan ida rua hodi hemu.