- Publika iha: 04 Novembro 2024
Ministériu Saúde (MS) agradese ba apoiu husi governu Australia no parseiru sira seluk ne'ebé sempre fó suporta, hodi Sentru Saúde Matan iha Timor-Leste konsege atinji ona atividade lubuk ida.
"Uluk ita ba Sentru Matan, ita la haree buat ida, no voluntáriu husi rai-li'ur maka makaas, agora Sentru Matan Nasionál sai modelu ida ba Hospital Nasionál Guido Valadares, tanba intervensaun ne'ebé aas tebes no dezenvolvimentu rekursu mós kapaas tebes.
Iha 24 anos ne'e oinsá ita haree fila fali halo manutensaun ba asisténsia sira ne'ebé iha ona no agradese mós ba Governu Australia no parseiru sira ne’ebé durante tulun ita, ohin loron ita bele atinji buat lubuk ida," hatete Vise-Ministru Saúde ba Operasionalizasaun Ospitál, Dr. Flávio Brandão Mendes de Araújo iha Selebrasaun Loron Mundial Saúde Matan ba dalarua-nulu-resin-haat (24), iha Palacio da Nobre Lahane, Díli.
Nia Informa, Sentru Matan Nasionál no HNGV sai sasin oinsá haree ba servisu profisionalizmu sira iha ne'ebá, organizasaun departamentu sira iha laran kapaas tebes.
"Ha’u lori MS nia naran hato'o parabéns ba profesionál saúde sira, liu-liu maluk sira ne'ebé maka dedika Sira-nia aan ho vontade no espíritu profisionalizmu ne'ebé forte iha Departamentu Matan ba atendimentu hotu ne'ebé iha," nia deklara.
Iha fatin hanesan Reprezentante WHO iha Timor-Leste Arvind Mathur esplika, Loron Mundiál Saúde Matan nian, hanesan lembransa krusiál ida kona-ba nesesidade atu foka ba saúde matan nian no prevensaun defisiénsia matan nian.
"Ita bele imajina iha mundu ida-ne'e ita labele haree ema ne'ebé ita hadomi nia oin, natureza nia furak, ka oportunidade sira ne'ebé iha oin, maibé ita barak maka konsidera ida-ne'e hanesan buat baibain," nia esplika.
Nia informa, hakfodak tebes hodi hatene katak 80% husi defisiénsia matan nian iha mundu tomak bele prevene, maibé ema barak maka kontinua moris ho konsekuénsia sira. La ho vizaun ne'ebé di'ak, odamatan ba edukasaun, empregu, no moris ne'ebé nakonu taka metin.
"Ita haree tema ba tinan ida-ne'e Labarik sira, hadomi imi-nia matan asegura saúde ba ita-nia matan komesa husi ita ki'ik atu bele salva ita iha futuru joven nian," nia Informa.
Nia hatutan, Loron Mundial Saúde Matan nian mós hanesan oportunidade ida atu halakon mitos sira no hamenus estigma kona-ba uza oklu ka uza medida koletiva sira seluk.
Nune'e mós, Difisensia Matan Juliana Ximenes dehan, ba Profesionál Saúde atu servisu makaas hodi fó atendimentu ba pasiente sira ne'ebé problema matan, tanba maluk defisiénsia matan barak maka agora iha Sidade Díli hodi hala'o nia moris loroloron.
"Ami presiza tebes atu ba konsulta matan, tanba ha'u uluk moris mai normál, maibé matan mean kona ha'u-nia matan, entaun ha'u-nia inan-aman laiha koñesimentu, sira foti ai-moruk uut hanesan Peliselina hodi fakar ba ha'u-nia matan laran to'o katarak kona, no ha'u agora la haree rai, tanba ne'e bele fahe informasaun klaru ba sira atu nune'e labele estraga sira-nia matan, maibé mai iha Sentru Matan Nasionál," nia afirma.