- Publika iha: 04 Novembro 2024
Organizasaun Mundial Saúde (OMS) hamutuk ho Ministériu Saúde (MS) halo revizaun konjunta nasionál no internasionál ba sistema vijilánsia kona-ba Programa Esensial Imunizasaun (EPI) no vasina sira ba prevene moras (VPD) iha Timor-Leste (TL).
“Revizaun konjunta nasionál no internasionál krusiál ida-ne'e ba ita-nia Programa Esensial Imunizasaun ka The Essential Programme on Immunization (EPI) no vasina sira ba prevene moras ka Vaccines prevene diseases (VPD) iha Timor-Leste," hatete Reprezentante Organizasaun Mundial Saúde iha Timor-Leste, Arvind Mathur iha Hotel Novo Turismo, Díli.
Nia dehan, iha grupu partisipante oioin husi organizasaun nasionál no internasionál sira reflete importánsia husi revizaun ne'e no vizaun kompartillada ne'ebé tenke kaer ba Timor-Leste ida ne'ebé saudável liu.
Nia esplika, imunizasaun mak intervensaun Saúde Públika ida ne'ebé kustu efetivu no disponivel, oferese valór esepsional ba investimentu, entaun ida-ne'e maka ferramenta ida hodi prevene moras infesiozu sira no salva joven barak nia moris.
“Durante dékada balun, Timor-Leste halo ona progresu signifikativu iha programa EPI nia okos, atinji marka boot balun, nasaun ne'e mantein nia estatutu livre hosi poliu dezde 1995.
Maske iha dezafiu infinitu sira ne'ebé hamosu husi pandemia, iha lansamentu susesu ida husi vasinasaun COVID-19 iha munisípiu hotu. Vijilánsia ba moras ne'ebé bele prevene ho vasina hadi'a ona ho signifikativu, maibé ita konsege halakon ona tétanu inan no neo-natal iha 2012, Timor-Leste konsege halakon sarampu iha 2018, no rubella iha 2023," nia informa.
Nia deklara, OMS sente orgullu tebes atu fahe katak Timor-Leste lansa ona vasina HPV ba labarik-feto tinan 11-14 iha tinan ida-ne'e no iha de'it semana tolu nia laran, notavel 91% husi labarik-feto sira ne'ebé alvu, simu ona vasina ne'e. Maibé, dezafiu barak mak sei iha ne'ebé tenke rezolve atu asegura katak labarik hotu iha asesu ba vasina sira ne'ebé salva.
Iha fatin hanesan, Xefe Departamentu Imunizasaun iha Ministériu Saúde, Onna Pereira deklara, atividade ne’e revizaun konjunta ba sistema vijilánsia kona-ba Programa Esensial Imunizasaun (EPI) no Vasina sira ba prevene moras (VPD) iha Timor-Leste.
“Revizaun ida ne'e atu halo monitorizasaun ba vasina serviks sira ne'ebé mak ita hala'o ona iha fulan kotuk liu ba, ita vasina ona labarik idade 11-14 iha eskola sira iha territóriu nasionál entaun vasina ida ne'e nia atendimentu la'o ho di'ak to’o ona 91,3%, entaun organizasaun sira hanesan CDC Atlanta, Universidade Sydney, Sede OMS, WHO SEARO, OMS Bangladesh, UNICEF EAPRO, sira mai haree diretamente vasina ne'ebé halo iha munisípiu sira,” nia Informa.
Reprezentante Ministériu Saúde provínsia NTT, Jeffray Jap ko'alia, revizaun kona-ba Programa EPI ho VPD importante tebes atu haree hamutuk.
“Ami sente kontente, tanba bele konvida ona ami hodi partisipa iha atividade ida-ne'e, relasiona ho moras ne'ebé bele prevene husi imunizasaun. Tanba moras ne'ebé bele prevene ho asaun imunizasaun ida-ne'e hanesan moras ida ne'ebé bele hada'et husi fatin ida ba fatin seluk.
Hanesan nasaun viziñu ida-idak presiza asegura nia nasaun liuhusi programa imunizasaun ne'ebé adekuadu hodi proteje komunidade husi moras da'et sira,” nia afirma.