- Publika iha: 08 Setembro 2011
Diretora Nasional Saude Komunitaria Ministeriu Saude (MS) Isabel Maria Gomes hateten prevene moras hepatitis B liu husi imunizasaun, e pesoal saude sira ioha fasilidade saude prontu atu atende sira ne’ebe hakarak hetan imunizasaun.
“Programa imunizasaun ne’ebe fo husi pesoal saude sira ne’ebe servisu iha ospital, klinika, sentru saude no postu de saude inklui klinka privadu sira ho objetivu atu prevene moras hepatitis B,liu-liu ba labarik sira,”informa Isabel Maria Gomes, semana kotuk iha Kaikoli,Dili.
Tuir nia, imunizasaun prvene moras Hepatitis B ne’e fo liu prioridade ba labarik sira ne’ebe ho idade foin moris to’o tinan ida nune’e bele proteje sira husi moras ne’e, tanba ne’e ba labarik sira ne;ebe hakarak atu simu imunizasaun bele ba iha fasilidade saude e pesoal saude sei halo atendementu.
Iha parte seluk Agustina Guterres,Xefe Enfermeira iha Klínika Bairo-pité (KBP) hateten moras hepatitis B bele hada’et husi inan ba oan tanba ne’e husu ba inan sira bainhira isin rua tenke ba konsulta iha sentru saude sira.
“Atu nune’e doutór sira pasa ai-moruk ba sira no inan ne’ebé maka detekta moras Hepatitis B entaun nia oan moris tenke hetan vasina
Hepatitis B tanba objetivu husi vasinansaun ne’e atu prevene moras ne’e,”nia dehan.
Nia hatutan, se wainhira maka inan sira bá halo konsulta maka doutór sira sei fó tratamentu tan ne’e inan sira tenke bá halo tratamentu atubele prevene entaun moras ne’e susar atu kona ba labarik sira, se wainhira maka inan sira la bá halo tratamentu maka sei la prevene tanba objetivu husi halo imunizasaun mak atu proteje labarik sira.