- Publika iha: 02 Janeiro 2024
Vise-Ministru Saúde Asuntu Fortalesimentu Institusionál, José dos Reis Magno hateten Estadus Unidus Amérika (EUA) liu husi ajénsia USAID nia programa sustentabilidade sistema saúde, fornese fundu ho montante $200,000 resin hodi finansia atividade formasaun ba jestór saúde kona-ba lideransa no jestaun.
Nia dehan diretór, xefe departamentu no xefe unidade sira iha ona posizaun, maibé importante atu eleva sira nia kapasidade no abilidade jestaun nian hodi bele implementa programa sira ho di’ak no fó benefisiu ba komunidade sira.
“Ha’u hakarak subliña katak programa dezenvolvimentu lideransa no jestaun ne’e la’ós de’it hanesan programa, maibé ida-ne’e asaun manifestasaun ida husi ita-nia kompremisiu koletiva atu hari sistema saúde ida forte no rezilente liu no sistema saúde sentral ne’ebé foku ba pasiente sira,” nia hateten hafoin partisipa iha serimónia lansamentu programa lideransa no jestaun iha Palasio da Sinzas Kaikoli, Díli.
Nia enkoraja forsa traballu saúde sira, liu-liu diretór, xefe departamentu no unidade sira atu aproveita oportunidade ne’e ba kresimentu no dezenvolvimentu institusaun nian, liu-liu asegura sistema saúde efisiente, sentralizadu ba paseinte no adaptavel ba mudansa iha futuru.
Iha oportunidade ne’e, Vise-Ministru lori governu da-sia nia naran hato’o agradesementu ba governu Estadus Unidus Amérika ho ajénsia USAID no parseru implementadór St. João of God ne’ebé halo ona eforsu hodi halo inisiativa ida-ne’e sai posivel.
Entretantu, Prezidente Institutu Nasionál Saúde Públika Timor-Leste (INSPTL), Doutora Merita Monteiro hateten sira-nia papel ida mak fornese treinamentu sira tantu kliniku no jestaun nian, tanba ne’e sei servisu hamutuk ho St João de Deus fo formasaun ba jestór saúde sira kona-ba lideransa no jestaun nian.
“Liuhusi parseria ida-ne’e INSPTL iha komitmentu bo’ot hamutuk ho St João de Deus atu halo formasaun iha área jestaun no lideransa ne’ebé di’ak ho kualidade atu ajuda hasa’e kapasidade diretór sira nian iha área jestaun iha nivel hotu-hotu husi nasionál to’o munisípiu sira,” nia hateten.
Nia hateten rezultadu husi formasaun ne’e mak promove governasaun ne’ebé di’ak liu, hasa’e kobertura organizasaun no promove utilizasaun dadus ne’ebé efetivu atu foti desizaun sira iha Ministériu Saúde laran.
Iha parte seluk, Enkarregadu Negósiu Embaxada Estadus Unidus Amérika, Marc Weintstock hateten governu EUA iha kompremisiu bo’ot atu apoia Ministériu Saúde hadia kapasidade umanu no dezenvolve forsa traballu hodi hametin sustentabilidade no promove governasaun servisu ne’ebé di’ak.
“Ami suporta hodi haforsa kapasidade institusional liuhusi programa lideransa no dezenvolvimentu jestaun, ne’ebé ho objetivu atu promove governasaun ne’ebé di’ak liu, hasa’e kultura organizasaun, optimiza dezempenu organizasaun no promove utilizasaun dadus ne’ebé efetivu hodi foti desizaun,”nia hateten.
Nia fiar ho apoia husi doador no ajénsia sira, Ministériu Saúde sei halo mudansa positivu hodi haforsa kapasidade no hadia kualidade servisu ba komunidade.