Sexta, Março 01, 2024
Total visitors: 766366

Xefe Sentru Saúde Bucoli iha Postu Administrativu Baucau Vila, Munisípiu Baucau, Maria Goreti Abuk informa, sira seidauk iha sala maternidade ketak tanba ne'e atendimentu partu ho observasaun hamutuk deit fahe ho kurtina.

Xefe Sentru Saúde Bucoli iha Postu Administrativu Baucau Vila, Munisípiu Baucau, Maria Goreti Abuk informa, sira seidauk iha sala maternidade ketak tanba ne'e atendimentu partu ho observasaun hamutuk deit fahe ho kurtina.

Nia dehan iha tinan 2023, numeru inan partu iha fasilidade saúde hamutuk na’in 61 no iha nain ida (1) mak partu iha uma ho asisténsia husi profesionál saúde.

"Loloos ne'e halo separasaun atu bele halo kontrolu infesaun, tanba bebé foin moris ne'e zero imun," nia hateten iha servisu fatin sentru saúde Bucoli, Baucau.

Nia hateten ekipamentu set partu nian iha sufisiente inklu kama partu rua hodi atende inan sira partu, maibé sira laiha ekipamentu warner atu tau bebé iha laran.

Nia hatutan sira mós oferese teste HIV, Sifilis no Hepatitis ba inan isin-rua ne’ebé vizita fasilidade saúde.

Kona-ba atendimentu planeamentu familiár, nia dehan inan sira maioria prefere uza métodu injesaun.

Iha parte seluk, Xefe Suku Terezinha de Jesus dos Reis hateten sira iha koordenasaun ne’ebé diak tebes ho profesionál saúde sira atu halo promosaun saúde ba komunidade atu hasae koñesimentu no konsiénsia atu hakbesik aan ba fasilidade saúde no muda mentalidade komunidade hodi adopta stilu moris saudável, liu-liu konsumu aihan lokál.

Nia rekoñese sei iha inan isin-rua balun mak partu iha uma, tanba preokupasaun barak.

"La’ós falta informasaun, informasaun iha tanba sosializasaun halo hela deit. Problema mak sira baruk, dala ruma ita inan feto sira hanoin mai iha fasilidade tenke lori ida-ne'e hatais ida ne'ebá ita preokupa deit buat sira-ne'e deside partu iha uma," nia hateten.

Nia hateten inan sira sempre tau problema iha oin, la tau saúde nu’udar prioridade.

Nia hatutan sentru saúde ne'e iha espasu atu harii uma maternidade, maibé fila fali ba governu nia planu.

Nia informa durante mandatu harii ona uma residensia ba profisionál sira.