- Publika iha: 14 Outubro 2023
Vise-Ministru Saúde ba asuntu Operationalizasaun Hospitais, Doutor Flávio Brandão hateten regularmente kada tinan rua governu China haruka ekipa médiku espesialista iha área oioin mai servisu hamutuk ho médiku nasionál sira iha Hospital Nacional Guido Valadares (HNGV), iha kapital Dili, hodi oferese tratamentu espesializada ba povu Timor-Leste.
Nia dehan brigada médika sira-ne’e halo servisu iha ospital nasionál de’it, tanba sira espesialista iha área oftamologia, sirurjia, cardiolojia, urulojia, obstetria, radiolojia, fisioterapia, no ortopedia.
“Ita-nia maluk sira-ne’e servisu ho didikasaun aas no profesionál tebes, ne’ebé sai ezemplu di’ak ba ita-nia ema sira rasik,” nia hateten hafoin partisipa serimónia despedida ho brigada médika China grupo da-sia ne’ebé termina ona missaun iha Timor-Leste, iha HNGV, Díli.
Nia hateten durante tinan rua, sira-nia kolaborasaun servisu di’ak tebes ho ekipa médika nasionál sira no estrutura konsellu HNGV rasik, tanba aleinde sira fó apoia tratamentu ba pasiente sira iha ospitál no partisipa iha atividade sosial, liu-liu halo konsulta komunitária iha suku sira.
Nia hatutan semana oin ekipa brigada China grupo da-10 sei to’o mai Timor, hodi kontinua apoia servisu tratamentu espesialidade iha ospitál nasionál.
Entretantu, Diretór Klíniku HNGV, Doutór Marcelino Correia hateten durante tinan rua brigada China, apoia tebes profesionál saúde sira iha ospitál nasionál, tanba sira iha kapasidade no prontidaun responde no halo intervensaun ba pasiente sira.
“Sira-nia prezensa iha ne’e suporta no apoia tebes ospitál, ida-ne’e la’ós premeira-ves, tanba kada tinan rua ekipa troka malu,” nia hateten.
Nia hateten aleinde ne’e sira mós apoia ekipamentu barak hanesan CT-Scan, mákina MRI, mákina lithotripsy uza hodi harahun fatuk iha sistema urinária, mákina laparoscopy no fó formasaun ba médiku sira atu utiliza mákina sira-ne’e fó atendimentu ba pasiente sira ne’ebé presiza.
Iha parte seluk, Reprezentante Brigada Médika China, Dr. Liu Yabin hateten, tinan 20 resin ona ekipa brigada China fo atendimentu médika ba povu Timor-Leste, liu-liu iha ospitál nasionál no atividade konsulta jerál ba komunidade iha suku sira.
“Durante tinan rua ikus ne’e, ami-nia ekipa médika halo buat barak ajuda povu Timor-Leste, liu-liu atendimentu iha ospitál nasionál no partisipa atividade outreach iha suku sira atu fó tratamentu gratuita ba komunidade no fó formasaun ba profesionál saúde iha munisípiu sira,” nia hateten.
Nia hateten durante tinan rua hala’o misaun iha Timor, liuhusi fó atendimentu iha HNGV no sentru saúde komunitária sira identifika katak povu nia nesesidade ba atendimentu saúde bo’ot tebes.
Nia informa governu China forma ona ekipa brigada China grupo da-10 hamutuk ema na’in 12 ne’ebé sei to’o mai Timor semana oin atu kontinua servisu apoia iha ospitál nasionál.