- Publika iha: 12 Setembro 2023
Diretóra Jerál Prestasaun Saúde, iha Ministériu Saúde, Odete da Silva Viegas rekoñese iha fasilidade saúde barak mak profesionál saúde menus no laiha, maské profesionál saúde, tantu médiku jerál, parteira, enfermeiru no tékniku aliadu barak mak dezempregu hela katak laiha servisu no sira halo hela mapamentu ba rekursu humanu iha fasilidade saúde hotu atu halo re-alokasaun molok loke vaga foun, tanba dadaun ne’e distribusaun kada munisípiu la ekilivru.
Nia dehan atu asegura asisténsia kuidadu saúde ne’ebé kualidade no hetan satisfasaun husi komunidade tenke iha rekursu humanu ne’ebé iha fatin, hetan kapasitasaun kontinua no apoia ekipamentu inklui medikamentu.
“Hahú kedas tinan rua liuba halo mapamentu atu haree distribusaun professionál saúde sira, tantu médiku, enfermeiru, parteira, tékniku aliadu sira. Espera governasaun ne’e bele kontinua atu responde ba nesesidade komunidade nian, liu-liu inan isin-rua sira iha área rurál,” nia hateten iha salaun Palácio das Cinzas Kaikoli, Díli.
Nia hateten iha governu da-hitu introdús polítika kontratu rejime internatu ba professionál saúde sira ne’ebé remata estudu atu servisu apoia iha fasilidade saúde sira iha teritóriu laran. Maibé iha tranziasaun governu da-hitu ba dala-ualu programa ne’e la kontinua.
Nia konsente situasaun atual iha munisípiu sira, liu-liu postu saúde sira iha suku enfrenta problema médiku laiha, tanba iha governu anteriór médiku jerál lubun ida mak transferénsia hotu mai iha Hospital Nacional Guido Valadares (HNGV) ho hanoin ida atu prepara sira ba hasai estudu espesialidade.
Nia hatutan ida-ne’e mak situasaun real ne’ebé iha katak postu saúde sira sei falta profesionál saúde sira, falta ekipamentu, medikamentu no infrastrutura bázika, tanba ne’e apela ba komunidade, liu-liu inan isin-rua sira tenke konsente saúde importante atu buka atendimentu.
“Ministériu saúde hala’o ona nia knaar, maibé parte individu no família sira mós tenke konsente sira iha problema isin-rua ho komplikasaun tenke hakbesik aan ba fasilidade saúde. Se sira la koopera mak situasaun sira la espera bele akontese,” nia husu.
Tuir dadus Diresaun Nasionál Rekursu Humanu, iha Ministériu Saúde, total funsionáriu permanente hamutuk 5490. Husi númeru ne’e purvolta 4200 mak ho rejime espesial katak profesionál saúde sira ne’ebé fó atendimentu kuidadu saúde direitamente ba komunidade.
Iha parte seluk, Xefe Sentru Saúde Internamentu Gleno, Munisípiu Ermera, Alcina Fernandes da Silva hateten sira iha médiku jerál na’in 10, parteira na’in 10 no iha mós enfermeiru inklui tékniku aliadu, maibé númeru ne’e la sufisiente no sira mós enfrenta problema ekipamentu medika no non medika ne’ebé uza barak kondisaun ladun di’ak ona.
Nia hateten parteira na’in 10 de’it, entaun la sufisiente halo rotasaun atende inan partu durante 24 oras no fó mós atendimentu ba konsulta kuidadu ante-natal, kuidadu pós-natal, planeamentu familiár, tanba ne’e parteira sira hotu destakadu iha sentru saúde, iha postu saúde iha de’it mak enfermeiru.
“Iha ne’e hahú Janeiru to’o Agostu, bebé na’in 10 mak mate. Husi ne’e na’in 9 mate iha inan nia kanotak, katak inan sira mai aprezenta aan iha fasilidade bebé mate ona loron rua liu ona no na’in ida mak mate ho asfiksia, katak moris mai ho kondisaun bele dada iis hela, maibé depois ami-nia kolega sira halo atendimentu labele salva.
Inan ne’ebé mate na’in tolu, husi ne’e na’in ida mate iha uma katak partu rasik iha uma, depois bolu ami to’o ba mate ona. Na’in ida fali mate iha ambulánsia laran, partu iha uma hetan problema sira atende labele ona mak bolu pesoál saúde ekipa to’o iha fatin tula iha kareta mate iha kareta laran. No horiseik ami mos iha kazu ida, inan ida partu iha uma bebé moris ho kondisaun mate tiha ona iha inan nia kabun laran loron rua liu ona, tanba bebé moris mai isin dodok ona, depois partu liu oras tolu akontese ran fakar bolu enfermeiru iha postu saúde to’o ba konsege tau soru no bolu ambulánsia ba tula, maibé to’o iha ne’e labele salva, tanba ran fakar barak ona iha uma,” nia hateten iha servisu fatin Gleno, Ermera.
Nia hateten sira-nia pesoál saúde na’in lima kompostu husi médiku no parteira hetan ona formasaun kona-ba Kuidadus Emerjénsia Obstetriku no Neonatal baziku atu jere kazu inan partu ho komplikasaun ne’ebé hetan referral husi sentru saúde komunitaria sira no postu saúde sira.
Nia informa kada fulan sira fó atendimentu ba inan partu purvolta nain 40 até 50, signifika númeru ne’e bo’ot tebes kompara ho númeru pesoal sira. No inan sira-ne’e balun mai ho komplikasaun grave, entaun sira tenke halo referral ba HNGV, Díli.