- Publika iha: 27 Agosto 2023
Diretora Saúde Munisípiu Covalima, Maria de Fatima Moniz informa la garante 100% inan isin-rua hotu ne’ebé vizita fasilidade saúde konsulta isin-rua, iha trimestre dahuluk asesu ba teste laboratóriu konfirma sira-nia statutu HIV, Sifilis no Hepatitis B, tuir protokolu kuidadu antenatal katak obrigatoriu inan isin-rua hotu tenke teste ran. Tanba reajente limitadu no la disponivel iha sentru saúde komunitaáia no postu saúde hotu.
Nia dehan servisu analiza laboratóriu ba inan isin-rua sira antes ne’e iha de’it sentru saúde komunitária. No iha tinan 2022, espande ona ba postu saúde sira ne’ebé iha laboratóriu atu asegura inan isin-rua asesu ba teste, maibé depende ba disponibilidade reajente.
“Infelizmente atu hateten de’it katak ba hepatitis B no sifilis nian, pedidu ba nasionál sira fó mai la tuir ita-nia pedidu,reajente sira-ne’e mós la disponivel to’o iha postu saúde. Maibé ba HIV ne’e to’o iha postu saúde, tanba stok reajente sufisiente atu halo teste ba inan isin-rua sira, bainhira halo konsulta isin-rua,” nia hateten via telefone.
Nia hateten bainhira postu saúde reajente laiha, mak pesoál saúde sira refere inan isin-rua sira ba sentru saúde komunitária atu halo teste laboratóriu, tanba importante atu inan sira mínimu halo teste laboratóriu dala ida durante isin-rua.
Iha parte seluk, Xefe Programa Moras Hada’et husi Relasaun Seksuál, iha Ministériu Saúde, Bernardino da Cruz rekoñese situasaun refere akontese, tanba iha tinan 2022, husi dadus estimasaun inan isin-rua 50,000 pursentu 50 de’it mak vizita fasilidade saúde konsulta kuidadu ante natal no husi pursentajen ne’e 64 mak teste laboratóriu, tanba reajente la disponivel iha fasilidade saúde.
Nia dehan governu halo esforsu ho apoia husi parseiru dezenvolvimentu sira fó formasaun ba pesoál saúde sira no asegura disponibilidade reajente iha fasilidade saúde husi ospitál, sentru saúde komunitária no postu saúde.
“Agora dadaun ita treinu tan ona pesoal sira iha postu saúde, atu inan isin-rua sira ne’ebé mai bele halo testu. Ita espera tinan ne’e hotu ita treinu ona ema hotu no distribui ekipamentu teste sira-ne’e ba sira atu halo teste laboratóriu ba inan isin-rua hotu,” nia hateten.
Nia hateten foin lalais ne’e sira simu tan apoia ekipamentu teste komidadu HIV no Sifilis hamutuk 70,000 husi UNFPA no governu mós sei sosa tan atu distribui ba to’o postu saúde, nune’e inan isin-rua hotu ne’ebé vizita asesu ba teste laboratóriu.
Nia informa iha tinan 2023, períodu fulan neen nia laran, inan isin-rua hamutuk 31,000 mak halo ona teste laboratóriu, liu-liu HIV no rezultadu hatudu inan na’in 15 mak konfirmadu pozitivu hetan infesaun HIV, tanba ne’e submete kedas ba tratamentu atu redús risku posibilidade transmite ba oan.