- Publika iha: 23 Maio 2023
Familia Pasiente baixa iha Hospital Nasionál Guido Valdares (HNGV), iha kapital Díli, Hermenegildo Alves hateten nudar sidadaun sente triste iha loron importante lakonsege ezerse nia direitu politiku tanba tenke hein moras iha hospital.
Komunidade husi suku Sau, Postu Administrativu Soibada, Munisipiu Manatutu ne’e hateten sira mai iha HNGV iha loron 6 fulan maio ho razaun familia moras. No sira lori ho kartaun eleitoral ho esperansa atu tuir votasaun, maibe ikus mai labele.
“Ami mai iha ne’e tanba moras no ekipa husi HNGV mai rejistu ami nia kartaun eleitoral, ikus mai STAE dehan ami nia kartaun tarde ona, entau ami sente problema bo’ot baa mi tanba ami hela iha timor ami labele vota,” nia hateten iha HNGV Bidau, Dili.
Nia hateten governu foun mai tenke hare hadia lei eleitoral atu fasilita ema hotu-hotu bele ezerse nia direitu politiku tanba kada tinan lima pasiente no familia sira ne’ebe baixa iha hospital sira barak mak lakon votus lakonsege ezerse sira nia direitu politiku.
“Hau labele ba vota tanba labele husik hela hau nia aman mesak iha ne’e. Ema laiha, tan ba deit hau nia votus husik hela hau nia aman mesak iha hospital mak hakarak lakohi hau hili dalan ida la ba vota,” nia hatutan.
Iha parte seluk, Kordenador Ekipa Preparasaun Elisaun Parlamentar 2023, iha HNGV, Miguel Guterres hateten lista ne’ebe sira submete ba STAE iha loron 11 maio, pasiente ho familia ida hamutuk na’in 224 no profesionais inklui funsionariu ne’ebe halao servisu iha loron elisaun 21 maio hamutuk na’in 420. Maibe iha loron elisaun pasiente ne’ebé baixa iha hospital hamutuk na’in 311.
“HNGV submete data lista pasiente ho familia ikus ba STAE iha loron 11 maio, entau pasiente ne’ebe mai iha dia 12 ate 20, ami nafatin tenta ho STAE atu halo rejistu adisional. Maibe ba STAE hateten tuir lei eleitoral lista hotu sumbete ba sira 20 dias antes elisaun, entau pasiente sira ne’ebe tama mai ne’e ami labele submete ona lista, signifika pasiente ho familia ne’ebe tama iha loron 12 mai ne’e sira la vota,” nia hateten.
Nia dehan husi 224 pasiente no familia ne’ebe rejista, iha balun ne’ebé alta no mate. Entau sira ne’ebe alta bele fila fali mai vota iha HNGV tanba naran iha lista ona.
Nia informa HNGV nudar estasaun votus movel husi sentru votasaun Kampung Bintang nian, ne’ebe nia mekanismu brigada STAE lori urna no kabina votus tama sala enfarmaria sira hotu atu fasilita pasiente ho familia ne’ebe naran rejistu ona hodi ezerse sira nia direitu.
Tuir observasaun TDW iha treinu nota katak, pasiente ho familia sira ne’ebe lakonsegue vota halo asaun protesta makas hasoru ekipa STAE no CNE. No atividade ne’e hetan observasaun maximu husi observador nasionál no internasionál sira. *