- Publika iha: 15 Maio 2023
Xefe Departamentu Kontrolu Kualidade no Komunikasaun Sosiál, iha Hospital Nasionál Guido Valadares (HNGV), Díli, Sara Maria Xavier informa sira rejistu kazu infesaun nosocomial iha sala enfermaria sira.
Nia salienta infesaun nosocomial ne’e infesaun ne’ebé asosiadu ho kuidadu saúde iha fasilidade saúde. Ema ida konfirma hetan infesaun nosokomia bainhira infesaun ne’e akontese durante halao tratamentu iha hospital no vizita moras iha hospital, ne’ebé posibilidade hetan transmisaun infesaun husi profesionál saúde sira.
“Bakteria ne’ebé moris iha ambiente HNGV ne’e perigu tebes tanba ita uza antibiótika, entaun bainhira mikrobiu ne’ebé moris iha ambiente tama ba pasiente nia ran, signifika katak ita pessoál saúde mak lori transmite ba pasiente liuhusi ita-nia liman ne’ebé la fase, la fase tuir momentu lima no la prátika aseptic ne’ebé lolos hodi transamite infesaun bakteria ne’ebé iha ita-nia liman ba pasiente,” nia hateten hafoin partisipa iha atividade kampaña ijiene liman iha HNGV Bidau, Díli.
Nia hateten tinan-tinan HNGV internalmente selebra loron mundiál ijine liman atu fó hanoin ba pessoal saúde sira hotu katak, parte prinsipál husi prevensaun ba infesaun mak ijiene liman tanba ne’e enkoraja profesionál saúde hotu atu prátika fase liman bainhira fó atendimentu ba pasiente sira hodi prevene infesaun nosocomia no prevensaun resisténsia antimicrobial.
Nia hatutan esforsu ne’ebé sira halo mak kria kondisaun sira hanesan fasilidade fase liman, alcohol iha sala enfarmaria hotu atu fasilita profesionál saúde, pasiente, família pasiente sira mantein ijiene liman atu labele tranzmite infesaun bakteria ba pasiente.
Nia haktuir iha fatór lubun ida-ne’ebé kontribui ba akontese infesaun nosocomial, liu-liu konsiénsia profesionál saúde sira-nian rasik atu prátika ijiene liman ne’ebé sei menus tanba ignoránsia, servisu limpeza ne’ebé la másimu.
Iha parte seluk, Koordenadór Rede ba Saúde, Joaquim Soares hateten profisionál saúde sira tenke sai modelu di’ak ida ba komunidade atu banati tuir, liu-liu ba prátika moris saudável sira.
Nia dehan prátika fase liman ne’e maneira ida-ne’ebé pozitivu tebes atu kontribui ba prevene moras lubun ida, entaun profisionál saúde sira tenke sai kampiaun ba prátika ida-ne’e atu ema hotu bele banati tuir.
“Ita hakarak eduka komunidade halo tuir instrusaun sira-ne’ebé iha, pessoál saúde sira mak sai nu’udar mestre, sira mak roll model ka ema ne’ebé banati tuir. Sé ita dehan labele fuma kuandu profisionál saúde fuma ne’e problema. Entaun buat sira hanesan ne’e ita tenke hatudu ezemplu di’ak ba sidadaun sira, se ita hakarak halakon moras ruma,” nia hateten.
Nia hateten konsiénsia sosiedade nian ba ijiene liman sei menus tebes, faktu ne’e hatudu liuhusi dadus estatístika moras hada’et sira-ne’ebé bele prevene husi aktu fase liman sei aas hanesan moras diarea.