Quinta, Junho 01, 2023
Total visitors: 754002

Diretór Ezekutivu Forum NGO Timor-Leste (FONGTIL), Valentim da Costa Pinto husu governu, liu-liu Ministériu Saúde ho Servisu Autonomia Medikamentu no Ekipamentu Institutu Públiku (SAMES, I.P) atu rezolve problema medikamentu tanba kleur ona fasilidade saúde sira husi postu saúde to’o hospital nasionál medikamentu esensial balun laiha atu fó tratamentu ba pasiente sira.

Diretór Ezekutivu Forum NGO Timor-Leste (FONGTIL), Valentim da Costa Pinto husu governu, liu-liu Ministériu Saúde ho Servisu Autonomia Medikamentu no Ekipamentu Institutu Públiku (SAMES, I.P) atu rezolve problema medikamentu.

Nia salienta aimoruk stok laiha ne’e problema ida-ne’ebé klásiku, akontese beibeik no agora kleur ona aimoruk items barak laiha komunidade tenke hasai osan sosa rasik iha klinika privadu sira.

“Ita mós kontinua observa katak públiku nia preokupasaun tanba funsionamentu sira iha postu saúde, klinika, hospital referal no hospital nasionál ita iha duni problema kona-ba stok aimoruk ne’ebé kontinua laiha, liu-liu ba moras sira-ne’ebé presiza atendimentu lalais ita laiha aimoruk,” nia hateten iha Manleu, Díli.

Nia preokupa governu la rezolve, aimoruk laiha durante tempu naruk mak afeta ema barak nia saúde, liu-liu familia kbi’it laek sira-ne’ebé laiha kapasidade atu asesu ba aimoruk iha klinika privadu sira.

Nia hateten governu tenke hanoin ona tau orsamentu ne’ebé bo’ot ba sosa medikamentu no ekipamentu médiku atu fasilita médiku sira fó atendimentu ba komunidade tanba dadaun moras barak ne’ebé rejista iha rai-laran tantu moras hada’et no lahada’et.

Nia hatutan esperiénsia passadu sunu aimoruk barak iha Tibar ne’e lisaun ladi’ak, maibé la signifika redús orsamentu tanba moras presiza aimoruk tenke tau duni orsamentu atu sosa medikamentu sira.

Entretantu, Diretór Administrasaun Finansas no Apoia Lojístika, iha HNGV, Raul Humberto Gama hateten sira halo ezersísiu ba orsamentu ne’ebé iha atu bele sosa medikamentu no konsomoves ne’ebé stok out iha SAMES, hodi fasilita profesionál saúde sira fó atendimentu ba pasiente sira iha hospital.

“Emerjénsia signifika buat ne’ebé bainhira SAMES laiha, maibé SAMES agora ita akompaña rutinamente stok out hela. Entaun ita osan ne’ebé iha ita halo ezersísiu ita bele sosa buat ne’ebé esensial liu, atu ita bele responde atendimentu iha hospital,” nia hateten.

Nia dehan tinan ida-ne’e sira tau orsamentu $200,000 resin atu sosa medikamentu no konsomoves esensiál ne’ebé médiku espesialista sira husu, maibé la tama iha lista kuantifikasaun SAMES nian. Maibé realidade items medikamentu no konsomoves esensial ne’ebé tama iha lista kuantifikasaun mós stok out, entaun sira ezekuta ona $100,000 resin.

Nia dehan Orsamentu Jerál Estadu ne’ebé aloka ba HNGV iha tinan 2023, ho montante millaun $13 resin, fahe ba kategoria saláriu vensimentu, bens servisu, kapital minor no kapital dezenvolvimentu.

Iha parte seluk, Diretór Armajenamentu no Distribusaun, iha SAMES, I.P, Octavio Fernandes informa aimoruk stok out dadaun ne’e 44 items ka 13% husi total 468 items ne’ebé kompostu husi aimoruk vitál, esensiál no nesesáriu.

Nia dehan stok out sira-ne’e barak liu mak item esensiál iha 52 items mak laiha no item vitál iha 18 items mak laiha tanba ne’e sira halo hela esforsu atu aselera prosesu kompras tinan 2023, hodi responde.

“Aimoruk vital sira-ne’e importante tebes, nia labele falta. Kuandu falta ema mate liu-liu iha kazu emerjénsia sira-ne’e tenke iha tanba ne’e mak ida-ne’e ita buka meiu halo nusa nia tenke iha atu responde,” nia hateten.