- Publika iha: 03 Maio 2023
Kordenadora Breastfeeding Café, iha Hospital Nasionál Guido Valdares (HNGV), iha Dili, Amelia Amaral Soares, dehan pesoal saúde no pessoal destakadu organizasaun Fundasaun Alola (FA) iha hospital, ne’ebé halao knar iha sala maternidade no pediatria halo apresaun ba susuben formula no bibiron ne’ebé familia lori, hodi enkoraja inan sira fo susu deit bebe sira.
Nia salienta iha periodu trimestre primeiru tinan 2023, sira prende susuben formula oioin ho bibiron lubuk ida, ne’ebe familia lori tama sein rekomendasaun husi mediku sira.
“Iha familia lori tama mai, maibe ami hare inan nia susuben barak ami prende susuben formula sira ne’e inklui bibiron no fo edukasaun ba inan sira atu fo susu deit bebe. Ba sira ne’ebé inan nia susuben seidauk iha mediku sira mak bele indika susuben formula atu fo ba bebe to’o susuben inan iha ona bele hapara,” nia hateten iha servisu fatin Bidau, Dili.
Nia dehan inan sira ne’ebé baixa iha ICU, depois partu. Maibe nia susuben iha ekipa sei ajuda hois susuben tau iha kaneka espesifiku hodi fo susu bebe. Inan sira ne’ebe susuben laiha duni kordena ho mediku pedatria sira atu indika susuben formula ne’ebé diak ba bebe konsumu hodi hein produsaun inan nia susuben.
Nia hateten iha trimetre primeru tinan 2023, sira identifika bebe nain 19 mak familia fo susuben formula husi bibiron no bebe nain 59 mak obrigadu fo susuben formula rekomenda husi mediku sira tanba razaun oioin relasiona ho kondisuan inan sira nian.
Nia haktuir durante fulan tolu nia laran, bebe hamutuk 413 mak baixa iha sala perinatologia ho problema asfiksia, kinur, mekonium, diarea, iis bo’ot no moras infesaun sira seluk.
Entretantu, Diretúr Kliniku, iha HNGV, Doutor Marcelino Correia hateten hospital implementa politika hadomi kosok oan, iha ne’ebé pasu importante ida mak bandu susuben formula no bibiron tama iha laran tanba ne’e kuandu laiha rekomendasaun husi mediku sira pesoal saúde no seguransa sira sei prende produtu sira ne’e.
“Ita nia hanoin ba inan sira ne’ebé mak sira nia oan mai moris iha hospital ne’e ita la autoriza atu sira fo susuben formula, exeptu tenke rekomendasaun husi mediku sira, ne’e mak bele fo. Maibe partu normal buat hotu diak hela ne’e diak liu fo susu deit,” nia hateten.
Nia dehan Ministeriu Saúde ho parseiru sira halo hela kampaña nasionál atu sensibiliza públiku tomak atu komprende importansia susuben inan nian hodi hamutuk suporta, proteze no promove susuben inan tanba susuben inan kontein nutrisaun kompletu ba bebe sira, liu-liu susuben kinur ne’ebe bebe sira tenke hetan hafoin oras ida moris.