Saúde Manatuto Rejista 59 Items Aimoruk Stok Laiha

Diretora Servisu Saúde Munisipál Manatuto, Mateus Vicente Correia informa sira rejista Aimoruk item 59 husi 262 items ne’ebé uza iha nivel munisípiu stok laiha.

Nia dehan situasaun ne'e perjudika tebes servisu atendimentu ba pasiente sira tanba limitasaun aimoruk.

"Husi 262 items, ita iha 59 items mak ami afeta stok out, entaun purvolta 22.5% mak ami laiha rezenva (stok out). Items sira-ne'e aimoruk esensiál sira hanesan parasetamol, amokselin, ibuprofin, prometazine no aimoruk seluk tan," nia hateten bainhira partisipa iha Annual Joint Meeting Review, ita salaun Mauhoka, Díli.

Nia hateten, sira halo ona pedidu ba armajen sentral, maibé stok mak laiha duni tanba ne'e seidauk hetan distribuisaun husi Servisu Autonom Medikamentu no Ekipamentu Saúde (SAMES).

Nia hatutan meiu ne'e-sira iha atu garantia servisu atendimentu la’o mak aimoruk ne’ebé laiha buka aimoruk seluk hodi substitui no aimoruk ne’ebé loloos, iha loron lima redús tiha ba loron rua atu pasiente seluk mós bele hetan tanba stok limitadu.

Iha parte seluk, Diretóra Ezekutiva Servisu Autonom Medikamentu no Ekipamentu Saúde (SAMES), Santana Martins rekoñese stok medikamentu iha armajen sentral items balun Mamuk, liu-liu Aimoruk esensiál.

Nia dehan sira la garantia stok aimoruk ba fulan hira oin mai, tanba mudansa lai rejime aprovisionamentu la fó fleksibilidade ba sira halo prosesu aprovisionamentu no kestaun prosesu deliverasaun husi kompañia sira tanba situasaun krize ekonomia mundiál, difisil atu asesu ba medikamentu sira.

"Ita halo esforsu hela atu oinsá fó solusaun ba situasaun stok ne’ebé liga ba item vital no esensiál sira-ne’ebé mak ita tenke iha," nia hateten.

Nia hatutan sira sei aprezenta lista balun ba Ministra Saúde atu foti desizaun, hodi bele hatama aimoruk sira ho lalais mai rai-laran tanba prosesu aprovizionamentu normál presiza han tempu.

Nia haktuir orsamentu ne’ebé aloka millaun $4 resin ne'e mós la sufisiente tanba ne'e sira halo esforsu atu husu tan osan adisionál no fundu kontijénsia atu bele sosa tan aimoruk.