- Publika iha: 11 Outubro 2022
Diretora Servisu Saúde Munisípiu Dili (SSMD), Agustina Seguradu informa hahú loron 30 fulan Setembru tinan 2022, atividade vasinasaun dose datoluk ka booster ba vasina Pfizer laiha tanba stok vasina Pfizer iha armajen sentrál laiha ona.
Nia dehan vasina Sinovac stok iha tanba ne’e sidadaun sira ne'ebé simu ona vasina sinovac dose I, dose II bele simu booster sinovac. Maibé ba sira ne’ebé simu ona vasina dose I no dose II vasina AstraZeneca tenke hetan booster Pfizer no vasina ne’e stok laiha.
“Ohin ita haree atividade konsulta ne’e pakote ida mak vasinasaun, maibé ohin ema lubun ida fila, tanba ita-nia vasina hotu iha dia 30 ne’e. Tuir planu loron 1 fulan Outubru ne’e, vasina tama ona, maibé ohin ami ba haree laiha,” nia hateten iha edifisiu administrasaun Dili.
Enkuantu, Diretora Ezekutiva Servisu Autónomu Medikamentu no Ekipamentu Saúde (SAMES), Santana Martins hateten sira halo ona komunikasaun ho ajénsia UNICEF, atu bele transporta vasina Covid-19 Pfizer mai rai laran tanba dadaun ne’e stok laiha ona.
“Ita esforsu oinsá husi UNICEF bele substitui fila fali Pfizer ne’e, ne'ebé ita iha komunikasaun kuaze fulan ida ona atu halo transportasaun,” nia hateten.
Nia hateten sira mós halo hela rekolha ba vasina Covid-19 sira ne'ebé expair (liu prazu) iha munisípiu sira, liu-liu vasina AstraZeneca no Pfizer tanba vasina Sinovac ne’e nia data expair iha tinan 2024.
Iha parte seluk, Joventude António Soares espera governu no ajénsia sira bele aselera lalais prosesu transportasaun vasina Pfizer mai rai laran atu joven sira bele hetan vasina kompletu booster, hodi bele buka servisu iha ema nia rai.
“Ita haree agora atu aplika ba vaga servisu no bolsu estudu ruma, iha rai liur rekejitu importante ida mak sertifikadu vasinasaun Covid-19, ne'ebé tenke dose III ou booster,” nia hateten.