Quinta, Dezembro 08, 2022
Total visitors: 692025

Membru Parlamentu Nasional, Deputada Josefa Alvares Pereira hateten tinan-tinan akontese inseguransa stok medikamentu iha rai laran tanba Ministeriu Saúde falha halo identifikasaun ba nesesidade medikamentu nasional atu bele tau osan ne’ebe sufisiente. Tanba Parlamentu Nasional halo aprovasaun deit ba orsamentu ne’ebe governu aprezenta lahatene kuantidade medikamentu ne’ebe presiza kada tinan.

Membru Parlamentu Nasional, Deputada Josefa Alvares Pereira hateten tinan-tinan akontese inseguransa stok medikamentu iha rai laran tanba Ministeriu Saúde falha halo identifikasaun ba nesesidade medikamentu nasional.

Nia salienta iha aimoruk barak mak stok laiha obriga familia pasiente sira hasai osan sosa iha farmasia privadu sira, maibe iha mos aimoruk balun ne’ebe tinan-tinan ba sunu tanba expair, ne’e hatudu katak problema iha jestaun identifikasaun nesesidade medikamentu.

“Desde uluk kedas iha segundu legislasaun, bainhira osan iha ami sempre husu mak ne’e ba edukasaun, saúde, turismu no komersiu, ami hotu hakilar. Maibe saida mak akontese to’o agora hatudu katak jestaun mak laiha, seidauk identifika didiak aimoruk ne’ebe presiza barak liu ou uza ho kuantidade bo’ot liu ba moras ne’e ita seidauk halo,” nia hateten Parlamentu Nasional Colmera, Dili.

Nia dehan Ministeriu Saúde mak hatene nesesidade medikamentu no orsamentu ne’ebe sufisiente atu sosa medikamentu sira, Parlamentu Nasional aprova deit orsamentu lahatene populasaun presiza medikamentu saida no kuantidade hira ba tinan ida.

Iha parte seluk, Mediku Psiquiatra iha Hospital Nasionél Guido Valdares (HNGV), Doutor Edmundo Monteiro hateten iha aimoruk oin tolu ne’ebe sira uza ba tratamentu moras mental sira iha sentru hanesan aimoruk Clorpromazina, Haloperidol, Olanzapine, maibe aimoruk rua Haloperidol no Olanzapine stok laiha kleur ona, entau obrigadu pasiente sira ne’ebe mai ho kazu agresivu, esquizofrenia, depresaun sira fo aimoruk ida deit mak Clorpromazina tablet no injeksaun tanba laiha opsaun aimoruk seluk.

“Aimoruk ne’ebe dadaun ne’e ita iha Timor-Leste mak opsaun tratamentu oin tolu ba kazu ida-ida nian, maibe aimoruk ne’ebe ami fo iha ne’e oin ida deit mak Clorpromazina no stok ne’ebe limitadu mos. Entau hakarak lakohi pasiente hotu ami fo aimoruk hanesan deit ita laiha opsaun seluk atu halai ba. Ema nia toleransia ba aimoruk lahanesan, maibe kestaun ami laiha opsaun ba aimoruk seluk tanba ne’e ami jere oinsa dosis ne’e labele aas liu atu bele pelumenus kontrola mantein iha leten deit labele tun,” nia hateten.

Nia hateten pasiente hotu-hotu konsumu aimoruk oin ida deit laiha impaktu ne’ebe seriu tanba sira kontrola nia dosis.