Sábado, Outubro 01, 2022
Total visitors: 668062

Primeru Ministru Taur Matan Ruak hateten governu aselera implementasaun planu mestre ba Hospital Nasional Guido Valdares (HNGV), ne’ebe komesa iha tinan 2022, ho hospital pediatria atu iha kondisaun ne’ebe sufisiente ba labarik sira ne’ebe moras presiza tratamentu.

Primeru Ministru Taur Matan Ruak hateten governu aselera implementasaun planu mestre ba Hospital Nasional Guido Valdares (HNGV).

Nia dehan governu nia prioridade mak ema tanba ne’e hahu halo investimentu ba harii universidade atu forma jerasaun foun sira no harii hospital hodi fo atendimentu saúde ne’ebe diak no kualidade ba povu.

“Ami halo hela esforsu, agora tinan ida ne’e, ita avansa ho pediatria ba ita nia oan sira. Hahu ida ne’e tinan oin osan iha hahu tan fatin seluk para kria kondisaun ba sira. Ita iha osan halo aeroportu aviaun la tun, ita iha osan halo auto-estrada kareta ida rua mak lao laiha osan ba hospital tanba sa, ita sira ne’e hotu buka hospital. Kuandu diak ita laliga mediku sira maibe ita moras ita hotu dehan sira tenke servisu diak oinsa se ita la tau matan ba sira,” nia hateten hafoin visita pasiente sira iha sala Maternidade HNGV Bidau, Dili.

Nia hateten governu ejiji profesional saúde sira halo servisu no profesional saúde sira mos husu governu kompleta saida mak sira presiza tanba ne’e governu hamutuk ho parseru dezenvolvimentu sira komite atu melhora hospital nasional no hospital referral sira to’o iha postu saúde atu fo atendimentu ba povu ne’ebe presiza.

Nia konsente setor saúde jeral sei iha dificuldade barak, maibe iha mos progressu lubun ida intermus kapasidade prestasaun servisu kuidadu saúde iha nivel komunidade to’o hospital nasional.

Iha parte seluk, Diretur Klinika, iha Hospital Nasional Guido Valdares, Dr. Marcelino Correia hateten problema klasiku ne’ebe sira enfrenta mak over load tanba numeru pasiente mai liu tiha kapasidade atu akumula.

Nia dehan akontese over load tanba espasu laiha no pasiente sira ne’ebe ho moras kaman inklui inan sira ne’ebe partu normal mos mai hotu iha hospital nasional.

“Realidade ita hare emergensia ne’e kazu nakonu ho ema sira ne’ebe moras kuidadu primaria nian, katak bele halo tratamentu iha sentru saúde sira tanba dadus ne’ebe relata husi supervisor sira katak kuaze 500 resin pasiente mai durante 24 oras ne’e 50% resin haruka fila iha deit 10 ate 15% mak iha indikasaun halo tratamentu iha hospital,” nia hateten.

Nia hateten presiza konsiensializa komunidade sira katak moras ne’ebe laiha indikasaun hasoru espesialista sir abele halo deit tratamentu iha postu saúde no sentru saúde sira, liu-liu iha munisipiu Dili tanba kuaze sentru saúde sira funsiona 24 oras atu redus todan ba hospital nasional.