- Publika iha: 24 Maio 2022
Diretur Nasional Farmasia no Medikamentu, iha Ministeriu da Saúde (MdS), Delfin da Costa Xavier Fereira hateten medikamentu herbal produsaun rai laran tama ona iha merkadu ba konsumu publiku, maibe seidauk iha lei proprio atu bele kontrola produsaun aimoruk sira ne’e nia kualidade no komposisaun sira hodi evita problema saúde publika seluk.
“Ita seidauk iha lei ida atu hare konaba produsaun, entau ita nia instrumentu seidauk prontu atu regula produsaun iha rai laran tanba ne’e ami laiha konhesementu ba produsaun aimoruk herbal sira. Atividade misaun madre sira halo pomade ne’e sira nia negosiu ami laiha konhesementu tanba lei laiha atu regula produsaun iha rai laran,” nia hateten iha Timor Plaza, Dili.
Nia dehan dekretu lei numeru 12/2004 konaba atividade farmaseutika fo poder ba sira atu kontrola produtu aimoruk importadu sira, liu husi asegura aimoruk hotu inklui herbal ne’ebe tama mai rai laran tenke rejistu.
Nia hateten dadaun ne’e iha kompaña tolu mak rejistu ona items aimoruk herbal hitu no hetan ona lisensa atu sirkula iha merkadu.
Nia rekonhese servisu kontrolu medikamentu seiduak maximu no sei iha items aimoruk herbal barak ne’ebe la rejistu sirkula hela iha merkadu tanba ne’e apela komunidade sira atu kontrbui halo kontrolu.
Nia haktuir tuir dekretu lei numeru 12/2004, iha sansaun oioin ne’ebe aplika ba importador la rejistu items aimoruk ne’ebe hatama mai rai laran, no sansaun sira ne’e mak suspensaun ou multa ho montante hahu husi $1,500 dolar Amerikanu to’o $50,000 dolar Amerikanu.
Iha parte seluk, Komunidade Teresa Soares hateten grupo barak, liu-liu madre sira mak dezenvolve atividade produsaun aimoruk herbal iha rai laran no ema barak mak asesu hodi konsumu.
“Ita hare ema barak mak sosa aimoruk sira ne’e konsumu tanba ne’e governu tenke kontrola no apoia atu hadia diak liu tan produsaun aimoruk sira ne’e hodi ajuda tratamentu ba moras,” nia hateten.
Nia hateten atividade produsaun aimoruk herbal tama ona iha merkadu no sai ona atividade negosiu ki’ik iha rai laran.