Quarta, Janeiro 19, 2022
Total visitors: 600398

Diretur Administrasaun Finansas e Apoia Logistika, iha Hospital Nasional Guido Valdares (HNGV), Raul Humberto Gama hateten tama fulan Dezembru tinan 2021, numeru pasiente admitidu ou baixa aumenta makas liu kapasidade tanba ne’e pasiente balun tenke toba iha koridor enfermaria sira nian.

Diretur Administrasaun Finansas e Apoia Logistika, iha Hospital Nasional Guido Valdares (HNGV), Raul Humberto Gama hateten tama fulan Dezembru tinan 2021, numeru pasiente admitidu ou baixa aumenta makas liu kapasidade.

Nia konsente overload sai hanesan problema klasiku iha hospital tanba kada tinan iha tempu udan monu rai numeru kazu hospitalizasaun aumenta makas, entau aumenta kama iha koridor enfarmaria sira atu akumula pasiente.

“Ita hatene hospital ne’e nia kapasidade kama iha 350 deit, agora pasiente ne’ebe tama mai 400 resin, entau espasu la sufisiente atu akumula ema hotu,” nia hateten iha servisu fatin Bidau, Dili.

Nia dehan desizaun ne’ebe sira foti hodi rezolve problema overload mak halo expansaun ba fatin enfarmaria sira ne’ebe sei iha espasu rai atu tau kama extra ba hodi akumula pasiente sira no ida seluk mak obrigadu pasiente sira toba iha koridor sira.

Nia hateten kondisaun dadaun ne’e hospital bele halo expansaun deit atu responde ba nesesidade aktual hodi hein implementasaun planu mestre ba hospital ne’ebe iha ona prosesu levantamentu ba konstrusaun nian.

Nia informa dadaun ne’e sira tau kama hat ou lima iha kada sala enfarmaria atu bele akumula pasiente sira.

Enkuantu, Diretora Servisu Munisipal da Saúde Dili, Agustina Segurado rekonhese fasilidade saúde ne’ebe eziste seidauk sufisiente kompara ho total populasaun ne’ebe iha Dili tanba ne’e importante atu ema hotu atensaun no kontribui ba asaun prevensaun ba moras sira iha tempu udan, liu-liu moras dengue.

Nia dehan hahu fulan Novembru tama Dezembru ne’e, numeru kazu dengue aumenta makas kuaze 40 resin presiza hospitalizasaun ou baixa tanba ne’e sira halo ona kordenasaun ho hospital nasional komunika malu hodi asegura atendimentu ba pasiente sira atu antisipa mortilidade a’as tanba dengue.

“Rekursu humanu ita laiha problema, fasilidade iha Dili ne’e ita bo’ot sira hare rasik kompara ho total populasaun sentru saúde sira difisil oituan akumula ema barak, maibe disponibilidade ba momentu atende kazu ita disponivel,” nia hateten.

Iha parte seluk, familia pasiente Anita Soares hateten triste hare pasiente sira toba deit iha koridor sira tanba hospital ne’e ema barak sai tama no fatin atu rai sasan mos laiha, maibe hakarak lakohi ne’e mak kondisaun ne’ebe iha ba pasiente sira.

“Pasiente sira presiza fatin ne’ebe dignu no la barulho atu sira bele deskansa ho diak, maibe ida ne’e mak kondisaun ne’ebe iha pasensia hodi hetan atendimentu saúde,” nia hateten.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04