Quarta, Janeiro 19, 2022
Total visitors: 600398

Presidente Asosiasaun Parteira Timor-Leste (APTL), Parteira Natalia de Araújo hateten sira finaliza ona kodigu konduta ou kodigu etika no padraun kompetensia ba parteira sira nian atu bele orienta servisu atendimentu kuidadu saúde ne’ebe kualidade ba inan no oan.

Presidente Asosiasaun Parteira Timor-Leste (APTL), Parteira Natalia de Araújo hateten sira finaliza ona kodigu konduta ou kodigu etika no padraun kompetensia ba parteira sira nian atu bele orienta servisu atendimentu kuidadu saúde ne’ebe kualidade ba inan no oan.

Nia dehan kada tinan lima sira halo alterasaun ba dokumentu sira hanesan kodigu konduta, padraun kompetensia no avaliasaun dezempenho espesifiku ba partera sira, maibe dokumentu sira ne’e la hetan konsiderasaun ne’ebe diak husi ministeriu da saúde tanba sira hakruk ba padraun kompetensia husi konfederasaun mundial partera nian.

“Ministeriu da saúde bele aprova ou hatama ami nia padraun kompetensia ba diploma ministerial. Ami husu nafatin avalisaun dezempenho espesifiku hodi sukat partera sira nia servisu tenke halao tanba ho nune’e ita bele garantia kualidade no sustentabilidade, laos dokumentu hakerek deit iha nivel nasional, maibe implementasaun ita tenke halao orientasaun ne’ebe kontinua atu populasaun bele sente benefisiu kuidadu saúde,” nia hateten hafoin partisipa iha kongressu Nasional APTL iha salaun Lux Clarita, Dili.

Nia hateten durante ne’e ema keixa partera balun halao servisu ladiak, maibe la bazea ba dokumentu legal ruma ne’ebe bele sukat prestasaun servisu partera nian.

Nia informa padraun kompetensia ne’ebe sira dezenvolve iha kompetensia walu ne’ebe partera sira bele halo durante halao servisu atendimentu iha fasilidade saúde sira.

Iha portunidade ne’e nia husu ministeriu da saúde atu aplika ona ezame kompetensia ba profisaun sira iha sistema saúde nian atu bele garante ema sira ne’ebe halao servisu prestasaun kuidadu saúde iha fasilidade saúde sira ne’e kompetente duni ba servisu ne’ebe sira fo.

Bazea ba dadus estatistika APTL nian hatudu total parteira iha Timor-Leste ne’ebe registradu iha sistema hamutuk nain 885. No parteira sira ne’e maioria ho nivel edukasaun Diploma I, 30% ho nivel edukasaun Diploma III no 10% ho nivel edukasaun lisensiatura.

Iha parte seluk, Diretur Nasional Saúde Publika, iha Ministeriu da Saúde, Carlito Correia hateten agradese ba APTL ne’ebe konklui ona sira nia kodigu konduta no padraun kompetensia hodi orienta sira halao servisu diak liu tan, liu-liu kuidadu saúde inan no oan sira.

“Ministeriu da saúde sempre akompaña asosiasaun sira finaliza sira nia dokumentu, agora partera hotu ona ita tenke hein tan sira mediku, enfermeru, analista, saúde publika no seluk tan atu ita bele hasai diploma ministerial ida bele regula asosiasaun hotu,” nia hateten

Nia dehan sira hare hela atu estabelese Konselho Nasional da Saúde, ne’ebe defini iha lei sistema saúde atu bele tau matan ba asosiasaun profesional saúde sira nian no apoia sira elabora kodigu konduta, padraun kompetensia sira atu bele orienta servisu atendimentu saúde diak liu tan ba povu.

Nia hateten komposisaun konselho nasional ne’e sei mai husi mos reprejentante asosiasaun sira nian ne’ebe sei tau matan diak liu tan ba asosiasaun sira nia ejijensia durante ne’e.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04