Quarta, Janeiro 19, 2022
Total visitors: 600398

Ministra da Saúde, Doutora Odete Maria Freitas Belo hateten apoia ró ambulansia ne’e importante no nesesariu tebes atu fasilita servisu evakuasaun pasiente sira ne’ebe presiza atendimentu urgente husi Ilia Atauro no Rejiaun Espesial Oecusse Ambeno (RAEOA) hodi hetan atendimentu kuidadu espesializadu iha hospital nasional.

Ministra da Saúde, Doutora Odete Maria Freitas Belo hateten apoia ró ambulansia ne’e importante no nesesariu tebes atu fasilita servisu evakuasaun pasiente sira ne’ebe presiza atendimentu urgente husi Ilia Atauro no Rejiaun Espesial Oecusse Ambeno (RAEOA).

Nia salienta durante ne’e governu hasoru dificuldade atu transporta pasiente husi Ilha Atauro no RAEOA mai iha Dili, liu-liu iha tempu udan. Maibe ho prezensa ró ambulansia ne’e bele ona responde ba nesesidade ida ne’e.

“Ró ne’e ajuda ami responde ba dezafiu sira ne’ebe ami nia nasaun hasoru durante pandemia Covid-19. Iha munisipiu Dili, liu-liu ema sira ne’ebe hela iha Ilha Atauro tempu udan ita hasoru dezafiu bo’ot bainhira atu halo evakuasaun ba pasiente sira ne’ebe presiza atendimentu espesializadu iha Hospital Nasional Guido Valdares. No sira ne’ebe hela iha RAEOA,” nia hateten hafoin simu ró ambulansia husi governu Indonesia iha Portu Dili.

Nia dehan governu asume reponsabilidade ba operasaun no manutensaun ró nian atu asegura nafatin iha kondisaun ne’ebe diak hodi fo atendimentu kuidadu saúde emergensia ba komunidade sira ne’ebe presiza atendimentu espesializada iha hospital nasional.

Nia hateten ró ambulansia ne’e hanesan simbolu amijade no solidaridade ne’ebe nasaun rua Indonesia no Timor-Leste iha no hametin liu tan koperasaun bilateral nasaun rua ne’e nia atu haforsa sistema saúde hodi fo prestasaun kuidadu saúde ne’ebe kualidade ba povu Timor-Leste.

Enkuantu Diretur Ezekutivu Servisu Nasionál Ambulánsia Emerjénsia Médika Institutu Publiku (SNAEM, I.P), Horacio Sarmento hateten ró ambulansia ne’e ajuda tebes servisu transferensia moras iha rai laran tanba durante ne’e governu iha akordu ho Mission Aviation Fellowship (MAF) hodi halo evakuasaun pasiente emergensia sira husi munisipiu mai iha hospital nasional, maibe operasaun halao deit iha tempu loron husi tuku 7:00 am to’o 17:00 pm.

“Dalabarak ita iha xamada iha kalan ita labele responde, entau ita husu apoia polisia maritime sira. Maibe dalaruma sira mos hasoru problema ita la bele responde no ikus mai ita nia ema sira hakotu iis tanba ita nia kapasidade atende seidauk bele,” nia hateten.

Nia dehan kondisaun aeroportu sira iha munisipiu mos seidauk diak atu bele aviaun semo iha tempu kalan tanba ne’e ba kazu emergensia sira iha tempu kalan labele responde, maibe ho prezensa ró ambulansia ne’e bele halo evakuasaun ne’ebe rapidu ba pasiente sira iha munisipiu ne’ebe iha kodisaun ba atrakasaun ró.

Iha parte seluk, Reprejentante Embaixador Indonesia, iha Timor-Leste, Alamsyah espera ró ne’ebe sira oferese ba governu Timor-Leste bele utiliza ho diak hodi fo atendimentu rapidu ba povu ne’ebe presiza, liu-liu iha situasaun pandemia Covid-19.

“Ami hare relasaun bilateral nasaun rua nian ne’ebe diak, ami hanoin iha servisu atendimentu ba surtu Covid-19 ne’e ita tenke fo liman ba malu servisu hamutuk atu responde ba problema ne’ebe iha. No governu Indonesia hato’o komitmentu hanesan nasaun amigu ba Timor-Leste, entrega ró ambulansia ida ba governu Timor-Leste,” nia hateten.

Nia informa orsamentu hodi sosa ró ambulansia ne’e ho montante $202,000 dolar Amerikanu, no nafatin servisu hamutuk ho kompania PT. FIBERBOAT atu fo formasaun ba ekipa naviador Timoroan atu halo operasaun no ba ró iha futuru.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04