- Publika iha: 10 Setembro 2021
Diretora Jeral Prestasaun Servisu Saúde, iha Ministerio da Saude, Doutora Odete da Silva Viegas hateten sira integra ona ekipa Australian Medical Assistance Team (AUSMAT) iha sistema servisu responde Covid-19 hamutuk ho ekipa nasional fo atendimentu ba pasiente sira iha sala izolamentu.
Nia salienta ekipa ne’e iha ema nain 8, ne’ebe mai husi area espesialidade oioin hanesan mediku internista nain 2, enfermeiru internista nain 2, paramediku nain ida, epidemiologista nain ida, logistika ligadu ho oksijéniu nain ida no lider ekipa ida tanba ne’e kolokasaun tuir sira nia area espesialidade, nune’e bele fo mos formasaun kliniku ba ekipa nasional sira.
“Virus ne’e bele muda aan husi loron ba loron, entaun importante ita tenke prepara rekursu humanu intermus konhesimentu kliniku no logistika sira mos presiza hare atu fo atendimentu diak liu tan ba ita nia populasaun sira tanba ne’e, ekipa ida ne’e sei hamutuk ho ekipa nasional pilar 7 atu organiza diak liu tan hodi fo atendimentu ne’ebe komprensivu,” Nia hateten iha servisu fatin Kaikoli, Dili.
Nia hateten situasaun aktual kestaun ne’ebe importante liu mak rekursu humanu ne’ebe iha konhesementu kliniku no ekipamentu mediku, medikamentu sira atu bele salva vida pasiente sira nian iha sala izolamentu.
Nia espera ho prezensa ekipa AUSMAT durante loron 28 ne’e bele ajuda no husik hela buat ruma ba ekipa nasional sira hodi bele kontinua luta salva populasaun husi infesaun Covid-19.
Iha parte seluk, Embaixador Australia iha Timor-Leste, Peter Roberts hateten governu Australia iha komitmentu atu hamrik hamutuk ho Timor-Leste iha situasaun difisil ida ne’e, entau ekipa AUSMAT sei servisu hamutuk ho ekipa nasional atu responde ba Covid-19.
“Ekipa emergensia ne’e, wainhira rai seluk hasoru dezafiu sira ba atu servisu hamutuk ho nasaun seluk. No agora evolusaun Covid-19 sa’e iha Timor-Leste, entau Australia prontu servisu hamutuk ho Timor-Leste,” nia hateten.
Nia dehan ekipa ida ne’e sei servisu besik liu ho ekipa profesional saúde nasional atu fo atendimentu iha sala izolamentu sira no servisu ho ministerio da saúde hodi hare nesesidade sira no oinsa Australia bele apoia intermus medikamentu no ekipamentu mediku nian.