- Publika iha: 10 Setembro 2021
Diretora Executiva Servisu Autonomu Medikamentu no Ekipamentu Saúde (SAMES), Santana Martins informa katak simu pedidu urgente husi ekipa mediku espesialista atu sosa aimoruk items hitu importante ba tratamentu pasiente Covid-19 iha sala izolamentu Vera Cruz no Lahane, iha kapital Dili.
Nia salienta medikamentu sira ne’e maka hanesan Remdesivir, Baracitinib, Tocilizumab, Vitamina C, Vitamina C tableta, Vitamina D3, no Budenisonide Nebulizer.
“Aimoruk items balun iha hanesan vitamina C, Vitamina C tableta ne’e ita kompras regular stok iha hela, maibe situasaun aktual konsumu aumenta bele kuantidade barak mos la aguenta. No items seluk ne’e foun tanba ne’e ita presiza sosa urgente,” nia hateten iha servisu fatin Kampung Alor, Dili.
Nia hateten sira loke tiha ona tenderizasaun ba kompras medikamentu hira ne’e, maibe laiha kompanha ne’ebe interese tanba kuantidade ne’ebe propoin ki’ik la to’o mil ho situasaun ne’ebe difisil atu halo movimentu.
Nia hatutan konseilho sei foti desizaun atu halo ajudikasaun direita ba kompanha ne’ebe disponivel atu hatama medikamentu sira ne’e iha tempu badak tanba nesesidade urgente.
Nia informa aimoruk hira ne’e laos deit susar atu asesu, maibe mos presu ne’ebe karun tanba ne’e wainhira laiha kompetetor mak sei implika ba presu.
Entretantu, Membru Parlamentu Nasional, Deputado Antonio da Conçeicão apela sidadaun hotu atu labele ejiji deit profesionalismu profesional saúde sira nian, maibe apoia sira tanba sira hasoru hela dezafiu bo’ot fo atendimentu ba pasiente sira hotu.
“Buat ne’ebe ita hotu tenke konsente mak, ita nia kondisaun iha sala izolamentu Lahane mos minimu katak iha maibe laos en kuantidade atu fo asistensia ba ema, nune’e mos iha sala izolamentu Vera Cruz,” nia hateten.
Nia hateten situasaun iha Lahane no Vera Cruz pratikamente grave tanba ne’e presiza apoia malu atu hakmaan transmisaun moras ne’e no salva mos ema nia vida.
Iha parte seluk, Ministra da Saúde, Doutora Odete Maria Freitas Belo hateten pandemia ne’e afeta ona prestasaun servisu kuidadu sekundario nian, ne’ebe presiza infrastruktura, ekipamentu mediku, medikamentu no rekursu humanu espesializadu atu halo atendimentu ba ema.
“Rekursu humanu laos deit ona mediku jeral, ita presiza ona mediku espesialista, ne’ebe ita hare rekursu ne’ebe presiza osan. Dalaruma ita nia osan iha, maibe rekursu tebes laiha,” nia hateten.
Nia enkoraja profesional saúde hotu atu halo servisu ho profesionalismu hodi trata pasiente sira ho Covid-19 no la ho Covid-19 tuir protokolu tratamentu ne’ebe iha.