- Publika iha: 01 Setembro 2021
Primeiru Ministru Taur Matan Ruak hateten sistema saúde nasional iha risku colapso tanba numeru kazu infesaun Covid-19 aumenta signifikante, profesional saúde barak hetan infesaun no menus fasilidade inklui ekipamentu mediku.
Nia salienta governu halo ona karta pedidu ida ba governu Australia atu husu ajuda rekursu humanu no logistika tanba Australia kompremetidu atu hamutuk luta hasoru propagasaun Covid-19.
“Espesialista atu maneja ventilador ita ladun iha, ne’e risku bo’ot ba sidadaun sira ne’ebe iha ne’eba. No numeru kazu aumenta signifikante ita iha deit kama rezerva 4 ou 5 tuir informasaun ne’ebe hau simu. Signifika nain lima tan sira seluk iha deit uma maka tau oxygenu karik hau lahatene,” nia hateten iha plenaria parlamentu nasional, Dili.
Nia dehan mortalidade Covid-19 iha semana rua ikus ne’e aumenta, no governu konsente ho situasaun ida ne’e no tenta posivel fo kontribuisaun tuir kibi’it ne’ebe proprio estado iha tanba labele halo buat ida wainhira laiha kondisaun.
Nia hateten governu liu husi minsiterio da saúde halo hela esforsu atu aumenta kuantidade ventilador no oxygenu hodi fo garantia ba pasiente sira.
Nia hatutan governu mos halo esforsu atu hasa’e kobertura vasina iha munisipiu sira, liu husi halo kampanha no sosializasaun ba komunidade konaba vasina tanba vasina mak ultimo meus ne’ebe efetivu atu prevene transmisaun virus.
Konaba pasagen ilegal iha frontera trestre ho numeru ne’ebe bo’ot, nia konsidera krime organizadu tanba ne’e governu servisu hamutuk ho Indonesia, liu-liu autoridade provinsia NTT hodi kaer ema hira ne’e. No konsege kaer ona elementu polisia no veteranus balun.
Tuir dadus evolusaun surtu Covid-19 iha Timor-Leste, iha loron 25 fulan Agostu tinan 2021, kazu infesaun foun hamutuk 361 no mortalidade ida. No kazu komulativu husi loron 21 Marsu tinan 2020 to’o loron 25 Agostu tinan 2021, hamutuk 15,296, kompostu husi nain 11,192 rekuperadu ona, 4.052 hetan akompanhamentu husi profesional saúde iha sala izolamentu sira, no nain 52 maka mate ona ho Covid-19.
Entretantu, Membru Parlamentu Nasional, Deputada Elvina Sousa husu governu atu asegura seguransa iha frontera terreste hodi evita pasagen ilegal sira, ne’ebe lori konsekuensia negativu ba nasaun.
“Reforsa seguransa iha frontera sai nudar fator determinante ida luta kontra Covid-19. No intensifika vasina ba maluk hira ne’ebe vulneravel liu ba infesaun virus ida ne’e,” nia hateten
Nia rekomenda governu reforsa atividade kampanha no sosializasaun atu enkoraja sidadaun hotu simu vasina tanba meus ida ne’e maka salva ita hotu.
Bazea ba komunikadu imprensa, ne’ebe TDW asesu konaba rezultadu sorumutu Konsellu Ministrus iha loron 25 fulan Agostu tinan 2021, katak governu deside aplika serka sanitaria no konfinamentu domisilariu jeral ba populasaun iha munisipiu Dili, hahu loron 27 Agostu oras 00:00 to’o oras 23:59 loron 2 fulan Setembru tinan 2021.
Extende serka sanitaria iha munisipio Ermera no konfinamentu domisiliariu jeral ba populasaun iha postu administrative Ermera vila no Railaco to’o oras 23:59 loron 1 fulan Setembru tinan 2021.
Alende ne’e aplika mos serka sanitaria iha munsipiu Baucau, Covalima no RAEOA to’o iha loron 8 fulan Setembru tinan 2021.