Quarta, Setembro 22, 2021

Diretora servisu saúde munisipio Dili, Agustina da Costa Segurado hateten kazu infesaun Covid-19 foun barak maka seidauk simu vasina, kompara ho sira ne’ebe simu ona vasina kompletu tanba ne’e sira esforsu halo aproximasaun iha fatin izolamentu atu fo vasina ba infetadu sira antes fila fali ba uma.

Diretora servisu saúde munisipio Dili, Agustina da Costa Segurado hateten kazu infesaun Covid-19 foun barak maka seidauk simu vasina, kompara ho sira ne’ebe simu ona vasina kompletu.

Nia dehan rekomendasaun Organizasaun Mundial Saúde (OMS) nian katak ema ne’ebe hetan infesasun Covid-19, depois fulan nen husi tempu rekuperasaun maka simu vasina tanba sira iha ona imunidade, maibe ho propagasaun variante Delta tenke asegura sira simu vasina antes sai husi izolamentu.

“Ida ne’e hanesan preokupasaun ida ba ita, tanba populasaun kuaze 25% iha munisipio Dili seidauk simu vasina. Entau estrategia ne’ebe ami halo alende buka ema iha aldeia sira fo vasina, identifika mos fatin sira ne’ebe kazu a’as hodi haforsa atendimentu vasinasaun,” nia hateten iha servisu fatin Formosa, Dili.

Nia hateten bazea ba dadus vijilansia nian hatudu sidadaun sira iha fatin izolamentu ba kazu lizeiru hanesan Tasitolu no hotel sira hamutuk 400 resin maka seidauk simu vasina dahuluk, no iha mos sidadaun sira ne’ebe halo pasagen illegal iha frontera iha fatin kuarentina seidauk simu vasina.

Nia hatutan atendimentu vasinasaun Covid-19 no atividade konsulta rutina sira iha fasilidade saúde kontinua lao nafatin durante periodu aplikasaun konfinamentu domisiliariu jeral tanba ne’e husu populasaun hotu ne’ebe moras tenke ba fasilidade saúde no sira ne’ebe hakarak simu vasina visita 29 postu vasinasaun sira iha Dili laran.

Nia informa espasu fatin izolamentu ba kazu lizeiru sei sufisiente hela tanba iha mos kontratu ho hotel sira, maibe izolamentu ba kazu grave no kritiku limitadu.

Iha parte seluk, Reprejentante OMS iha Timor-Leste, Dr. Arvind Mathur, hateten vasina laos uniku fator determinante atu prevene infesaun Covid-19 tanba simu vasina kompletu mos iha posibilidade hetan infesaun tanba ne’e importante simu vasina kompletu no nafatin kumpri protokolu prevensaun Covid-19.

Nia dehan ema ne’ebe simu vasina kompletu ona iha posibilidade atu hetan infesaun Covid-19, maske nune’e wainhira hetan infesaun mos ho kondisaun lizeira ou kaman tanba ne’e risku ki’ik atu transmite fali ba ema seluk, no evita dezenvolve komplikasaun sira ne’ebe halo kondisaun sai kritiku to’o lakon vida.

“Dadus hatudu mai ita katak, husi sira ne’ebe hetan infesaun Covid-19 maioria seidauk hetan vasina, no numeru ki’ik maka simu ona vasina nafatin hetan infesaun.Tanba ne’e hau hakarak ita hotu ho konfiansa halo advokasia hodi konvense ema hotu atu mai simu vasina,” nia hateten.

Nia enkoraja governu no parseiru sira hotu servisu makas hodi hasa’e kobertura vasina iha nasional no munisipio sira. No asegura nafatin implementasaun medida prevensaun sira hanesan uza maskara, fase liman, eveita agrupamentu, distansia fisiku.

Tuir dadus iha semana kotuk 16-22 fulan Agostu tinan 2021, ema ne’ebe baixa iha izolamentu Vera Cruz no Lahane tanba Covid-19 iha 41 ate 54 ou 76% seidauk simu vasina kompara ho sira ne’ebe simu ona vasina kompletu iha 11 ate 54 ou 20%. Signifika ema ne’ebe seidauk simu vasina iha probabilidade bo’ot liu dala rua atu baixa kompara ho sira ne’ebe simu ona vasina doze kompletu.

Dadus evolusaun surtu Covid-19, iha Timor-Leste, husi loron 21 fulan Marsu tinan 2020 to’o loron 26 fulan Agostu tinan 2021, komulativu kazu konfirmadu hamutuk 15,603. Husi numeru ne’e nain 11.344 rekuperadu ona, nain 4,203 ativu hetan akompanhamentu iha sala izolamentu sira, no nain 56 mak mate ona ho Covid-19.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04