Quarta, Setembro 22, 2021

Diretur Nasional Gabinete Politika Planeamentu Koperasaun, iha Ministeriu da Saúde (MdS), Narcisio Fernandes hateten vasina Covid-19 doasaun sufisiente kobre populasaun idade tinan 18 ba leten tanba ne’e governu seidauk deside atu sosa tan vasina.

Diretur Nasional Gabinete Politika Planeamentu Koperasaun, iha Ministeriu da Saúde (MdS), Narcisio Fernandes hateten vasina Covid-19 doasaun sufisiente kobre populasaun idade tinan 18 ba leten.

Nia salienta doasaun vasina Covid-19 ho kuantidade bo’ot mai husi governu Australia, COVAX facility, governu China, governu Japaun, governu Nova Zelandia no governu Portugal.

“Governu mos preve hela orsamentu ne’ebe sufisiente atu sosa vasina, maibe agora ita jere lai doasaun ne’ebe iha ba populasaun alvu sira, tanba estimasaun ne’ebe iha vasina doasaun sufisiente hela,” nia hateten iha parlamentu nasional, Dili.

Nia dehan total orsamentu ne’ebe governu tau hodi sosa vasina hamutuk $12 miloens, maibe doasaun sufisiente hela tanba ne’e governu hare fali asuntu logistika sira hanesan jelera ba vasina pfrizer, ne’ebe governu deside ona atu introdus ba sidadaun idade tinan 12 to’o 17.

Nia hatutan nasaun doadore sira iha komitmentu nafatin atu apoia vasina, ekipamentu mediku no rekursu humanu mai rai laran hodi ajuda governu luta hasoru propagasaun surtu Covid-19.

Iha parte seluk, membru parlamentu nasional, deputada Elvina Sousa hato’o agradesementu ba nasaun amigu sira ne’ebe fo ona doasaun jenerozu ba povu Timor-Leste iha luta hasoru surtu Covid-19, liu-liu governu Australia, Estado Unidus, Portugal, China, Japaun no Nova Zelandia.

“Ami konsiente katak meus ida atu valoriza liña frente sira nia servisu no sakrifisio iha luta hasoru covid-19 no asegura ita nia saúde maka, ita hotu tenke kumpri regas medida prevensaun sira hodi evita problema saúde publika no colapso ba sistema saúde iha Timor-Leste,” nia hateten.

Nia husu governu atu intensifika kampanha sosializasaun ba populasaun, liu-liu iha area rural konaba vasina no enkoraja ema hotu simu vasina tanba vasina uniku meus efetivu atu prevene infesaun Covid-19.

Iha oportunidade ne’e nia husu governu atu aselera lalais prosesu pagamentu subsidio ba liña frente sira, hanesan meus ida atu motiva sira halao servisu makas liu tan iha situasaun ne’ebe difisil.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04