Quarta, Setembro 22, 2021

Diretor Konselho Administrativu foun iha Hospital Nasional Guido Valdares (HNGV), Dr. Alito Soares hateten iha prorgrama lubun ida ne’ebe sei implementa hodi melhora prestasaun kuidadu saúde iha hospital nasional, maibe sei fo prioridade liu atu estabelese unidade kardiologia no oncologia tanba estatistika hatudu numeru moras fuan no kankru a’as no laiha kapasidade atu halo tratamentu iha rai laran.

Diretor Konselho Administrativu foun iha Hospital Nasional Guido Valdares (HNGV), Dr. Alito Soares hateten iha prorgrama lubun ida ne’ebe sei implementa hodi melhora prestasaun kuidadu saúde iha hospital nasional.

Nia dehan duante tinan 15 serivsu iha hospital nasional nota katak nesesario tebes atu estabelese unidade kardiologia no oncologia tanba numeru transferensia moras ba rai liur barak liu moras fuan no kankru.

“Planu ne’ebe ami hanoin lubuk ida, maibe prioridade ne’ebe hau hanoin maka unidade kardiologia tanba liga ba ita nia numeru transferensia moras ba liur aumenta no gastus bo’ot. No unidade importante ida seluk maka oncologia diagnostika histologia atu bele ajuda ita nia maluk sira ne’ebe sofre moras kankru, ita bo’ot sira sempre hetan informasaun moras ne’ebe domina refere ba liur maka fuan no kankru. Entau ita tenke tau atensaun ba ida ne’e,” nia hateten hafoin simu tomada de pose nudar director executive HNGV, ba tinan tolu oin mai.

Nia hateten estatutu internal HNGV nian oferese prestasaun kuidadu saúde tersiariu, liu-liu area espesialidade no sub-espesialidade, maibe durante ne’e fo mos atendimentu ba kuidadu saúde sekundario no primaria tanba limitasaun rekursu, ekipamentu no medikamentu iha hospital referal no sentru saúde internamentu sira.

Nia hatutan esforsu seluk maka re-organiza rekursu humanu ne’ebe iha no tau matan ba sira nia direitu sira atu bele hamutuk melhora prestasaun kuidadu saúde ne’ebe kualidade no dignu ba komunidade sira.

Entretantu, Ministra da Saúde, Dra. Odete Maria Freitas Belo rekonhese prestasaun servisu kuidadu saúde iha HNGV iha progressu diak tebes kompara ho tinan hira liu ba kotuk, maibe presiza esforsu nafatin atu hadia servisu sira ne’ebe iha hodi fo prestasaun ne’ebe diak ho kualidade no dignu ba komunidade sira.

“Hau iha konfiansa tomak katak ita bo’ot sira serivsu hamutuk nafatin hodi lori Hospital Nasional Guido Valdares ba prestasaun kuidadu ne’ebe diak liu. HNGV nudar top referensia no sentru ba kuidadu tersiariu nafatin tau atensaun ba kombate moras hotu, liu-liu surtu ne’ebe ita hasoru,” nia hateten.

Nia konsiente HNGV sei enfrenta dificuldade no limitasaun barak hanesan infrastruktura, ekipamentu mediku no medikamentu sira, maibe sei halo esforsu atu fo apoia tomak ba HNGV hodi rezolve problema sira ne’ebe identifikadu.

Iha parte seluk, Membru Komisaun F asuntu saúde, protesaun sosial no igualidade jeneru, iha Parlamentu Nasional, Deputada Helena Martins husu profesional saúde sira hotu atu servisu hamutuk buka solusaun ba dezafiu sira ne’ebe iha hodi fo prestasaun servisu ne’ebe diak ba pasiente sira.

“Orsamentu ne’ebe tau ita bo’ot sira maka halo ezekusaun, espera ezekusaun sira ne’e atende duni ba nesesidade ba ita nia komunidade, liu-liu ba HNGV tanba fatin ida ne’e maka sentru ba atendimentu saúde iha rai ida ne’e,” nia hateten.

Nia konsente orsamentu ne’ebe aloka kada tinan labele responde ba hotu ba nesesidade sira tanba orsamentu ne’e aloka ba ministerio hotu tuir planu prioridade ne’ebe iha.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04