Domingo, Junho 20, 2021
Total visitors: 566016

Jestor Klinika Bairo Pite (KBP), Inacio dos Santos hateten sira iha pasiente besik 20 maka tratamentu dependente ba medikamentu insulina, maibe fulan rua ona sira nia stok aimoruk ne’e laiha tanba ne’e obrigadu pasiente sira tenke hasai osan hodi sosa iha klinika privado sira atu bele sona regular.

Jestor Klinika Bairo Pite (KBP), Inacio dos Santos hateten sira iha pasiente besik 20 maka tratamentu dependente ba medikamentu insulina.

Nia dehan durante ne’e sira hetan apoia aimoruk husi ministerio da saúde, liu husi Servisu Autonom Medikamentu no Ekipamentu Saúde (SAMES), no sira mos hetan doasaun aimoruk insulina husi organizasaun Insuline for Life Australia. Maibe situasuan surtu Covid-19 dificulta transportasaun aimoruk tama rai laran.

“Ita iha pasiente nain 10 resin besik 20 maka tratamentu insulina dependente, signifika sira tenke sona insulina durante moris tomak. Maibe iha periodu serka sanitaria no konfinamentu obrigatoriu ne’e ita iha inan feto ida maka lakon vida tanba ita nia stok insulina la sufisiente,” nia hateten iha servisu fatin Bairo Pite, Dili.

Nia dehan opsaun ne’ebe sira iha maka, ba pasiente ne’ebe iha kapasidade finanseru, sira fo reseita ba sosa aimoruk iha klinika privado sira. No pasiente ne’ebe laiha osan, sira buka alternative seluk hodi fo aimoruk antibiotika no aimoruk tableta moras diabetes seluk.

Nia informa sira mos enfrenta problema stok menus ba medikamentu seluk inklui konsumiveis sira iha sala emergensia.

Iha parte seluk, Xefe Departamentu Moras Lahadae’t, iha ministerio da saúde, Dr. Frederico Bosco dos Santos hateten iha tratamentu oin rua ba moras diabetes maka tratamentu ba prevensaun, signifika tratamentu atu prevene tama iha komplikasaun. No kontrolu liu husi estilu vida ne’ebe saúdavel hanesan dieta balansu labele konsumu aihan ne’ebe kontein midar no mina barak, karbonhidratu barak. No halo exersisio fisiku atu kondisaun labele sai grave tanba diabetes ne’e moras kronika labele kura.

Nia dehan tratamentu ne’e depende ba iha avaliasaun kondisaun tanba tratamentu iha faze hanesan pasiente balun konsumu aimoruk no kontrola hahan, maibe balun tenke sona insulina durante vida tomak.

“Sira dependente insulina maka la sona bele hetan komplikasaun oioin ba orgaun sira, hanesan bele tama iha komplikasaun polineuropotia katak sistema nervo labele suporta muskulu sira ou la bele fo energia. Entaun halo komplikasaun hanesan kanek ruma iha ain labele diak lalais hamosu infesaun ikus mai tenke halo amputasaun,” nia hateten.

Nia dehan dadaun ne’e atendimentu insulina bele hetan deit iha hospital sira, maibe medikamentu diabetes tableta seluk hanesan Glibencamide, metformin bele hetan iha sentru saúde sira.

Nia informa sira halo ona diskusaun atu disponibiliza mos medikamentu insulina ba sentru saúde sira hotu hodi fo tratamentu ba pasiente sira ne’ebe presiza tanba pasiente balun hela dook no enfrenta limitasaun oioin atu asesu ba hospital hodi hetan tratamentu.

Tuir dadus peskiza fator risku ba moras lahada’et iha tinan 2014, hatudu 1.5% populasaun Timor-Leste sofre moras diabetes.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04