Domingo, Junho 20, 2021
Total visitors: 566016

Porta voz komisaun Interministerial ba Vasina kontra Covid-19, Doutora Danina Coelho, informa ba publiku katak hahu loron 7 fulan Abril to’o loron 20 Maio tinan 2021, sidadaun hamutuk 53.000 resin maka simu ona vasina AstraZenaca doze dahuluk.

Hahu loron 7 fulan Abril to’o loron 20 Maio tinan 2021, sidadaun hamutuk 53.000 resin maka simu ona vasina AstraZenaca doze dahuluk.

Nia salienta, kampanha vasinasaun kontinua lai iha Munisipio Dili, hanesan sentru epi ba Surtu Covid-19 tanba ne'e enkoraja sidadaun hotu ne'ebe ho idade 60 ba leten no sira ne'ebe sofre moras kronika atu bele simu vasina.

"Ohin loron, ema hamutuk 53.000 resin simu ona sira-nia vasina doze dahuluk. Iha Timor-Leste hahu kedas kampanha vasina iha loron 7 fulan Abril," nia dehan liu husi konferensia imprensa iha Ministerio Solidaridade Sosial, Kaikoli, Dili.

Nia dehan kampanha vasinasaun faze dahuluk ho apoia vasina husi COVAX facility, ema kuaze 28.000 resin maka simu ona vasina. No iha faze daruak ho apoia vasina 20.000 doze husi governu Australia konsegue vasina ona ema hamutuk 25.000 resin iha munisipio Dili. Husi numeru ne'e sidadaun ho comorbidade nain 6.046 ou 24%, no ema ho tinan 60 ba leten la ho moras komorbidade nain 1.268 ou 5%, no pesoal lina oin sira nain 4.555 ou 18%, pesoal saude nain 110 ou 1%, no adultu sira tinan 60 mai kraik la ho moras komorbidade nain 13.011 ou 52%.

Nia hatutan kobertura ida ne’e seidauk atinji grupo alvu sira, liu-liu ema idade tinan 60 ba leten no ema sira ho moras kronika tanba ne’e governu deside kampanha vasinasaun laos deit halao iha fasilidade saúde, maibe halao mos iha sede suku no sede aldeia sira iha munisipio Dili.

Nia informa husi total sidadaun ne’ebe simu ona vasina 53,000 resin, ema nain 15 maka hetan reasaun adverse, no nain ida ho kondisaun grave tanba hetan reasaun alergia hafoin simu vasina.

Entertantu, Diretora Servisu Saúde Munisipio Dili, Agostinha Segurado hateten kampanha vasinasaun iha munisipio Dili kontinua lao nafatin tanba Dili maka munisipio ne’ebe afetadu liu ho infesaun Covid-19 iha Timor-Leste.

"Ita sei kontinua ho kampanha vasinasaun iha semana hirak mai ne'e iha Dili, munisipu ne’ebe afetadu liu ho infesaun COVID-19 iha Timor-Leste. Taxa kazu konfirmadu agora maizumenus 100 resin kada loron iha Dili no liu husi vasinasaun deit no kumpri protokolu sira deit maka bele hapara transmisaun husi Covid-19 iha ita nia komunidade sira,” nia hateten.

Iha loron 5 fulan Abril tinan 2021, vasina ho kuantidade 24.000 apoia husi COVAX facility to’o iha Timor-Leste, no iha loron 7 fulan Abril, hahu lansamentu kampanha vasinasaun faze dahuluk ba ekipa liña frente sira. No governu Australia oferese tan vasina ho kuantidade 40.000 doze, ne’ebe fo prioridade ba ema vulneravel sira iha munisipiu Dili.

Iha Parte seluk, Membru Parlamentu, deputada Gabriela Alves husu governu atu aselera servisu hodi hasa’e kobertura vasinasaun iha teritorio nasional tanba numeru kazu aumenta makas kada loron iha Dili no munisipio seluk.

“Ita atu halo prevensaun, entau husu ministerio da saúde bele book aan lalais lao to’o area rural sira hodi hare ona ema sira ho idade avansadu no sira ne’ebe sofre ona moras sira seluk ne’ebe iha,” nia hateten.

Nia mos sujere ekipa saúde atu intensifika atividade sosializasaun ba komunidade sira konaba importansia vasina no swab atu ema hotu bele intende hodi kopera ho governu redus risku propagasaun virus no kombate virus ne’e iha rai laran.

Tuir dadus komulativu Covid-19, iha Timor-Leste, hahu 21 Marsu tinan 2020 to’o 20 Maio tinan 2021, hatudu katak total kazu konfirmadu hamutuk nain 5.121. Husi numeru ne’e nain 2.712 rekuperadu ona, no nain 2.398 sei ativu halo tratamentu iha fatin izolamentu, no nain 11 maka mate ona.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04