- Publika iha: 24 Maio 2021
Xefe Gabinete Kontrolu Kualidade no Komunikasaun Sosial, Iha Hospital Nasional Guido Valdares (HNGV), Sara Maria F. Xavier informa katak iha fulan Abril tinan 2021, pasiente nain 19 husi total 1.982, ne’ebe tama iha iha sala emergensia mate tanba kondisaun grave.
Nia dehan pasiente ne’ebe tama iha sala emergensia ho diferente kazu hanesan moras kronika, asidente trafiku ho motor no kareta, hetan violensai domestika, hetan violensia fisiku social, mout iha tasi no rai hanehan, no intosikasaun.
“Pasiente ne’ebe mate iha sala emergensia iha fulan Abril, sira ne’ebe to’o mai sala urgensia mate tiha ona hamutuk nain 11, no mate iha emergensia nain 8,” nia hateten iha servisu fatin Bidau, Dili.
Nia dehan husi total 1.982 pasiente ne’ebe tama iha sala urgensia, nain 19 mate, no nain 592 maka alta kedas depois hetan tratamentu no observasaun iha sala urgensia, no seluk tenke admitida ou baixa iha sala enfermaria sira tanba presiza kuidadu intensive ba sira nia moras.
Iha parte seluk, Membru Parlamentu Nasional, Deputada Irene Gonzaga Sarmento husu jestor HNGV atu hadia jestaun atendimentu iha sala emergensia tanba dala barak atendimentu sira lao demora hodi prejudika vida pasiente sira nain.
Nia observa rasik atendimentu iha sala urgensia hare katak pasiente sira ba ho kazu urgente hanesan hetan asidente ran fakar presiza atendimentu lalais salva vida, maibe dala barak sei preiza liu tenda triajen rejistu no halo teste swab ba Covid-19.
“Husu ba ministerio relevante atu hadia sistema tanba ita nia ema barak mate ne’e laos mate tanba moras,maibe atendimentu sira ne’ebe kleur maka halo ita nia ema sira hanesan ne’e,” nia hateten.