- Publika iha: 04 Maio 2021
Diretor Kompanhia Blue Stone, David Montalvão hateten sistema mobile application bele fasilita professional saúde sira atu buka tuir sidadaun sira ne’ebe hetan ona vasina primeru dose, no asegura sira atu kompleta segundu dose, sei simu iha fulan Junho mai.
Nia salienta ema hotu ne’ebe utiliza telefone android, bele tama playstore hodi instala aplikasaun ne’e iha telefone, no rejistu atu hetan numeru password tanba sistema ne’e sei fo informasaun ba sira kona ba saúde, nune’e mos fo hanoin atu simu vasina Covid-19.
“Sistema ida ne’e laos deit halo tracking ba vasina, maibe iha modul barak hanesan bele halo apoitmentu ho mediku sira atu konsulta la presiza ba koalia direta ho ema sira registu iha fasilidade saúde sira. No ba sira ne’ebe vasina ona iha sistema ne’e mos iha sertifikasaun vasina, ne’ebe karik lao sai ema ruma husu bele loke sistema hodi hatudu prova katak vasina ona,” nia hateten hafoin partisipa iha serimonia lansamentu Aplikasaun Mobile Registu Eletroniku Saúde na Familia, iha Palacio da Sinzas Kaikoli, Dili.
Nia dehan sistema ne’e liga direta kedas ho sistema rejistu saúde eletroniku, ne’ebe instala ona iha fasilidade saúde hotu iha teritorio tomak tanba ne’e bele utiliza aplikasaun mobile ne’e hodi asesu ba atendimentu kuidadu saúde hahu husi primaria to’o tersiaria.
Iha parte seluk, Diretor Nasional Saúde na Familia, Vitor Soares hateten iha tinan 2015, governu lansa ona sistema rejistu saúde elektroniku iha fasilidade saúde hotu tanba ne’e ho sistema aplikasaun mobile ne’e bele fasilita diak liu tan servisu atendimentu saúde iha situasaun surtu Covid-19.
Nia dehan sistema aplikasaun mobile ne’e bele ajuda professional saúde sira buka tuir ema sira ne’ebe tama mai rai laran atu bele iha kontrola ne’ebe diak no efetivu liu tan iha situasuan surtu.
“Ita problema ho Covid-19, no programa kampanha vasina ne’ebe lao hela entaun bele ajuda fasilita servisu sira ne’e diak liu tan. Alende ne’e servisu rutina sira seluk hanesan konsulta inan isin rua sistema ne’e bele rejistu,” nia hateten.
Nia dehan sitausaun agora ho aplikasaun protokolu preventivu Covid-19 hanesan distansia fisiku, distansia social sistema ne’e ajuda tebes tanba sidadaun sira ne’ebe rejistu ona bele halo appoitmentu direita ho mediku sira iha fasilidade saúde besik via telemovel.
Iha oportunidade ne’e, nia hato’o agradese ba Timoroan David Montalvão, ne’ebe dezenvolve ona sistema ne’e no oferese sistema ne’e gratuita ba minsiterio da saúde atu utiliza hodi halao servisu.