Ministra da Saúde, Doutora Odete Maria Freitas Belo hateten familia husi matebian ho inisial AB, ne’ebe mate hodiseik rezultado teste PCR hatudu positivu Covid-19, maibe latama iha izolamentu livre hela hamutuk ho agrupamentu iha sala izolamentu Vera Cruz oin.

Ministra da Saúde, Doutora Odete Maria Freitas Belo hateten familia husi matebian ho inisial AB, ne’ebe mate hodiseik rezultado teste PCR hatudu positivu Covid-19.

Nia dehan ekipa saúde la konsege halo evakuasaun ba sala izolamentu tanba matebian nia fen no oan ida rejeita hodi la simu rezultado laboratoriu ne’ebe iha.

“Ida ne’e mak hau tau iha kestaun, nia fen no oan ita husik tanba ita la rona malu. Sala ne’e atu fo ba se governu ou ministerio da saúde ne’e labele tanba moras ne’e pandemia ita hotu tenke kontribui,” nia hateten hafoin halo audensia publika ho komisaun F iha parlamentu nasional, Dili.

Nia dehan sidadaun nain rua ne’e hamutuk ho ema grupo bo’ot ida inklui mos lider nasional Kay Rala Xanana Gusmão iha sentru izolamentu Vera Cruz oin, no ema barak la uza maskara lori hela virus ne’e ba mai.

Entertantu, microbiologista, iha Laboratoriu Nasional Saúde, Nivio Sarmento hateten fila fali ba familia sira atu fiar ou la fair rezultado teste ne’ebe laboratoriu divulga sai, maibe rezultado sira ne’e bazeia ba sensia sentifiku no tekniku ne’ebe adopta iha Timor-Leste ba teste Covid-19 nian.

“Fila fali ba familia sira atu fiar ou lae fiar, ami hanesan laboratoriu hasai rezultado bazea ba siensia ne’ebe iha no tekniku ne’ebe ami iha kompara ho nasaun seluk. Ami halo ona external quality assurance ne’ebe nia kualidade ne’e komparavel ho nasaun seluk, ne’ebe ami fiar ho ami nia rezultado,” nia hateten.

Nia dehan hahu inisio surtu Covid-19, Timor-Leste adopta teste molekula ne’ebe bolu naran Polymerase Chain Reaction (PCR), ne’ebe mundu tomak uza hodi halo teste ba Covid-19 tanba teste ida ne’ebe sensitivu tebes.

Nia informa matebian AB nia rezultado laboratoriu teste PCR hatudu duni positivu Covid-19.

Iha parte seluk, Presidente Cruz Vermelha de Timor-Leste (CVTL), Madalena Hanjan hateten governu enfrenta situasaun difisil atu halo kontrolu ba propagasaun Covid-19 iha rai laran tanba movimentu hahu lao fali ho agrupamentu bo’ot iha fatin barak.

“Ita hare iha prevensaun ne’e hau hare mosu ona dificuldade bo’ot tanba lockdown loke ona kareta bemo sira halai fali ona, governu nia kapasidade atu halo teste swab ba ema hotu-hotu seidauk klaru, atu duni tuir ema ne’ebe positivu to’o familia tomak hau hare dificuldade bo’ot. Entau ita hare katak agora fila fali ba ema ida-ida nia aan atu kontrola no prevene aan tanba ita lahatene virus ne’e namkari ona iha Dili laran,” nia hateten.

Nia dehan kestaun ida entre fiar ou la fiar ezistensia Covid-19 ne’e, problema ida no estado, liu-liu ministerio da saúde iha kompetensia atu hakbesik aan ba ema sira ne’e atu konvense sira.