Sexta, Abril 16, 2021
Total visitors: 558227

Diretur Ezekutivu Organizasaun Klibur Domin, Joaquim Soares hateten durante periodu estado emergensia no aplikasaun serka sanitaria atividade deteksaun sedu ba kazu tubercolouse iha munisipio Liquisa, Baucau no Viqueque la lao.

Diretur Ezekutivu Organizasaun Klibur Domin, Joaquim Soares hateten durante periodu estado emergensia no aplikasaun serka sanitaria atividade deteksaun sedu ba kazu tubercolouse iha munisipio Liquisa, Baucau no Viqueque la lao.

Nia salienta situasaun surtu Covid-19 fo implikasaun bo’ot tebes ba programa kontrolu moras tubercoluse iha mundu inklui mos iha rai laran tanba intevensaun ba deteksaun kazu menus, tratamentu ba pasiente positivu sira falha, no transmisaun moras ne’e kontinua lao iha komunidade.

“Ita koalia lolos deit, servisu ba programa TBC ne’e paradu hela. Tratamentu ba sira ne’ebe positivu ne’e lao hela, maibe atividade deteksaun kazu ne’e paradu hela tanba deit cut reach laiha, entau ita ajuda fali ministerio da saúde hodi utiliza makina GeneXpert ne’e ita iha hodi halo teste ba Covid-19,” nia hateten via telephone.

Nia dehan dadus nasional kona ba mortalidade kauza TBC, hatudu kada tinan ema kuaze 1400 resin maka mate, situasaun agora ho surtu Covid-19 sei kontribui makas liu tan ba taxa mortalidade iha rai laran.

Nia hatutan moras tubercolouse sei sai problema bo’ot ba saúde publika iha rai laran tanba hahu tinan 2020, servisu deteksaun kazu tun signifikante tebes no korente transmisaun ba moras ne’e kontinua lao iha familia no komunidade nia leet.

Nia informa sira iha makina GeneXpert tolu, ne’ebe instala ona iha klinika klibur domin Tibar, ida iha munisipio Baucau no ida seluk iha sentru saúde Viqueque Vila, ne’ebe durante ne’e halo teste ba TBC agora apoia fali teste ba Covid-19.

Iha parte seluk, Vice Ministru da Saúde Bonifacio Maucoli dos Reis rekonese Timor-Leste nasaun ne’ebe taxa morbilidade no mortalidade moras tubercolouse a’as liu iha rejiaun sudeste asia tanba taxa insidensia moras tubercolouse iha Timor-leste maka 498/100,000 populasaun, no taxa mortalidade 88/100,000 populasaun, signifika kada loron ema nain 3 to’o 4 maka mate tanba moras tubercolouse.

Nia dehan taxa ida ne’e kontribui makas husi problema struktural ne’ebe eziste tinan naruk ona iha rai laran maka hanesan problema kiak no malnutrisaun ne’ebe sei a’as.

“Peskiza mos hatudu kuaze tinan barak besik 30% to’o 40% maka la konsege detekta no kontinua hada’et iha komunidade tanba fator determinante sira hanesan kustu transporte hodi asesu ba fasilidade saúde, hahalok profesional saúde sira nian iha estabelesementu saúde ne’ebe atende pasiente kleur, konesementu no hahalok komunidade no pasiente nian hodi buka kuidadu saúde sei menus tebesn tanba edukasaun no informasaun ne’ebe seidauk maximu ba komunidade,” nia hateten

Nia dehan alende problema asesibilidade kestaun seluk maka komunidade sira sei fiar forte ba tratamentu tradisional sira tanba dala barak visita uluk matan dook sira molok sira ba fasilidade saúde.

Nia informa programa HIV/SIDA, TBC no Malaria, governu kontinua simu apoia orsamentu husi Fundu Global no governu Koreia hahu tinan 2013, hodi harii laboratoriu bioseguransa iha atu reforsa kapasidade diagnostika. No kontinua apoia durante periodu 2020-2024, hodi haforsa kapasidade deteksaun kazu no jestaun tratamentu iha komunidade ne’ebe sei kopera ho organizasaun lokal sira hanesan Klibur Domin, Fundasaun Alola, Klinika Bairo Pite, Maluk Timor, Caritas Diocese Dili atu hasa’e taxa deteksaun ba kazu no tratamentu.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04