Inan Isin Rua-Inan Fo Susu La Tama Grupo Hetan Vasina COVID-19

Xefe Departamentu Promosaun Saúde, Iha Ministerio da Saúde, Misliza Vital hateten vasina Covid-19 AstraZeneca ne’ebe governu Timor-Leste deside atu introdus iha rai laran seidauk bele sona ba inan isin rua, inan fo susu no labarik tinan 17 mai kraik iha situasaun agora tanba sei iha etapa estudu ba grupo sira ne’e.

Nia salienta estudu sira agora hatudu vasina AstraZeneca so bele fo deit ba ema sira ho idade tinan 18 ba leten, maibe la signifika sira seluk la hetan tanba peskiza sira sei kontinua lao hela.

“Sira ne’ebe isin rua, fo susu no idade tinan 17 mai kraik ne’e ita esklui la tama iha grupo ida hetan vasina, nia razaun, laos governu mak deside, maibe AstraZeneca maka deside tanba sira seidauk iha evidensia ne’ebe forte katak AstraZeneca ne’e bele fo ba ema isin rua, fo susu no idade 17 mai kraik,” nia hateten bainhira sosializa vasina ba jornalista sira iha salaun Palacio da Sinzas Kaikoli, Dili.

Nia dehan grupo sira ne’ebe sei hetan vasina iha faze primeiru maka ekipa linha frente sira hanesan pesoal saúde, membru FALINTIL-Forsa Defeza Timor-Leste (F-FDTL), membru Polisia Nasional Timor-Leste (PNTL), pesoal tekniku eletrisidade, agua no saneamentu, inklui jornalista sira. No grupo segundu mak populasaun sira ho moras kronika hanesan tensaun alta, diabetes, moras fuan no seluk tan. No grupo ikus maka populasaun sira ho idade tinan 60 ba leten.

Nia hatutan 20% husi total populasaun maka sei hetan vasina faze primeiru iha loron 7 fulan Abril tinan 2021, no 80% sei hetan iha faze segundu iha fulan Setembru tinan 2021.

Nia informa implementasaun vasina ne’e ho karakter voluntario, signifika katak sidadaun grupo idade tinan 18 ba leten ne’ebe ho voluntariomente hakarak hetan vasina bele visita sentru definidu sira sona vasina.

Iha parte seluk, reprezentante Organizasaun Mundial Saúde (OMS), Doutor Arvind Mathur hateten sira rekomenda governu Timor-Leste atu introdus vasina AstraZeneca tanba seguru, efetivu no relativu ho kondisaun korente malirin iha rai laran.

Nia dehan tinan ida resin mundu luta hasoru pandemia covid-19, no finalmente iha ona vasina hanesan maneira ida atu prevene, maibe ida ne’e sei la hakotu kedas pandemia tanba ne’e kontinua kumpri protokolu preventivu sira.

“Ami kontente tebes rekomenda vasina AstraZeneca, no suporta ministerio da saúde tanba vasina ne’e seguru, efetivu no bele uza ba ema idade tinan 18 to’o 65. No importante vasian ne’e bele tau iha kondisaun korente malirin 2?C to’o 8?C tanba korente malirin sira ne’e eziste ona iha rai laran, ne’ebe durante ne’e uza ba vasina nasional seluk,” nia hateten.

Nia dehan prosesu atu asesu ba vasina remata ona, no tempu badak sei vasina 20% sei to’o iha rai laran atu bele hahu halo vasina ba grupo sira ne’ebe defini ona husi governu.