Segunda, Janeiro 25, 2021
Total visitors: 544459

Diretora Executiva Laboratório Nasional Saúde (LabNas), Endang Soares da Silva hateten kapasidade laboratório nian kada loron bele halo teste ba amostra suspeitu COVID-19 hamutuk 300, tanba sira iha ona ekipamentu ne’ebe avansadu no rekursu humanu ne’ebe proprio atu halo teste.

Diretora Executiva Laboratório Nasional Saúde (LabNas), Endang Soares da Silva hateten kapasidade laboratório nian kada loron bele halo teste ba amostra suspeitu COVID-19 hamutuk 300.

Nia dehan prosesu instalasaun teste COVID-19 laos fasil tanba presiza kompleta buat barak hodi garante seguransa ba pesoal sira no asegura kualidade husi teste refere rasik.

“Ho apoia sira tomak ne’ebe iha, laboratório nasional saúde iha kapasidade halo teste amostra covid-19 hamutuk 300 iha loron ida. Esforsu ida ne’e signifikante tebes tanba ita hotu hatene iha inisio pandemia COVID-19, ita laiha kapasidade halo teste,” nia hateten iha servisu fatin Bidau, Dili.

Nia hateten laboratório kontinua eleva nia servisu hodi fornese teste ne’ebe ho kualidade a’as. Nia haktuir ho investimentu ida ne’e sei eleva servisu laboratório nian iha area diagnostika, screening, vijilansia ba moras hadaet sira no peskiza kliniku iha rai laran.

Entretantu, Ministra da Saúde Doutora Odete Maria Freitas Belo hato’o agradese ba parseiru dezenvolvimentu sira ne’ebe fo ona apoia eleva kapasidade laboratório nasional saúde nian hodi responde ba surtu COVID-19.

“Hau orgulho tebes ho laboratorio nasional nia servisu. Imi nonok deit maibe imi halo buat ida ne’ebe spetakuler tebes tanba laiha esforsu husi imi, ami nia dalan mak haruka amostra ba teste iha liur, laiha tan opsaun seluk,” nia hateten.

Nia dehan laboratório nasional saúde hetan ona akreditasaun ba teste COVID-19 tanba rezultado teste ne’ebe iha hatudu 100% loos no akuradu.

Iha parte seluk, Embaixador Australia iha Timor-Leste, Peter Roberts hateten atinjimentu ne’ebe LabNas hetan signifikante tebes tanba inisio labele halo teste, maibe agora bele halo teste ba amostra 200 resin iha loron ida.

“Susesu ida ne’e importante tebes hodi detekta kazu COVID-19 positivu ho lalais liu tan no prevene transmisaun iha Timor-Leste. Ita hotu tenke orgulho ho atinjimentu ida ne’e,” nia hatete.

Nia dehan governu Australia iha komitmentu atu apoia nafatin ministerio da saúde hodi implementa vasina COVID-19, bainhira vasina prontu ona.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04